الاثنين، 31 مارس 2008

الكمال لله

مفيش حد كامل .. كلنا فينا عيوب ,, صحيح بعض عيوبنا بتكون مبلوعة واكترها بيكون لا يحتمل
وطبعا التغيير صعب دا اصلا لو كان البنى ادم عايز يتغير !! طيب والحل؟
بصراحة .. مفيش حل
الا اذا كان فيه استعداد شخصى للتغيير للاحسن وده بيكون نادر جدا !!!
يبقى مفيش الا اننا نرضى بالحلول الوسط
يعنى : نحط البنى ادم ( اللى فيه عيوب اقصد) فى الميزان .. ماهو كل واحد ليه ميزان وعنده ميزان .. او ده المفروض
الميزان ده اقصد بيه ميزان معنوى .. مش ميزان طبيعى ( ما احنا مش هنوزن خضار )
طيب نعمل ايه بقىبالميزان ؟؟
اقولكم : نحط العيوب فكفة .. والمميزات فكفة ,, ماهو كلنا برضه فينا مميزات !
اه ممكن تكون قليلة بس ليها اهمية ووزن بالنسبة لحد فينا .. بل احيانا بتكون ميزة واحدة اهم من كل الميزات يعنى مثلا : حد يكون حنين والحنية دى هى غاية المراد من رب العباد بالنسبة لشخص ما ولو لقاها بيتغاضى عن العصبية مثلا او الغيرة او اى عيب تانى وهكذا
يعنى حاجة بتغطى على حاجات كتير .. كل على حسب اهميته بالنسبة للشخص المتضرر
وكمان بلاش ننسى اننا برضه فينا عيوب والاشخاص اللى بنتعامل معاهم اكيد متضررين منها بس اكيد برضه عندنا ميزة او اكتر هما حبينها يبقى الاسلم والاحسن اننا نتغاضى شوية وهما يتغاضوا شوية علشان المركب تمشى ونرجع تانى ونقول مفيش حد كامل ولا خالى من العيوب
الكمال لله وحده
دمتم .




































هناك تعليقان (2):

المُهاجر يقول...

طيب وإيه يضمن إن ما يكون في غش في الميزان ؟؟
وهل الميزان الحساس يفرق عن الميزان القباني ؟؟

طبعاً ده تهريج .. تعالي بقى للجد

إذا كان كل إنسان له مميزات وله عيوب وده لا خلاف عليه إزاي نقدر نضع مميزاته وعيوبه بالحق إلا إذا كنا احنا شخصياً خالين من عيب قصر النظر ؟

بمعنى لو في شخص صادق .. دي ميزه كبيرة يمكن تتفوق على عيوب كثيرة
لكن المشكلة ان هذا الصادق يفسر على انه شخص مدب مالوش في الاتيكيت
( ألا هو ايه الاتيكيت ده ؟؟ )

واحد تاني كذاب والعياذ بالله لأن الكذب أصل كل الشرور .. يقولوا عليه دا راجل مجامل ومهذب ..

يعني الصدق أصبح عيب والكذب أصبح ميزه .. أي ميزان ينفع في الحالة دي ؟؟

dreem يقول...

اقولك يا مهاجر
بما ان البنى ادم انانى بطبعه فأكيد هيكون متمسك بالشخص التانى حبا للميزة الموجودة فيه ( مش حبا فيه طبعا )وبالنسبة للكذب ما عنديش حل !
طب هاتلى البنى ادمين وانا اربيهم مالاول ,, او اديلهم دروس توعية
وهيكون الدرس الاول بلاش نكدب
مع انى عايزة اقولك على حاجة يا مهاجر الراجل المدب من وجهة نظر الست بيكون ليه سبب تانى غير انه صريح !!!
الست يا عزيزى ودن (تخيل) ودن تحب تسمع كلام حلو حتى لو كان كدب او مجاملة !!!!!!!
وهو ده معنى فن الكتاكيت .. اكل ودان
ومسح جوخ
انت عارف : انا بس عايزة الفت نظر اللى هيقرا الكلام ده ان العيشة مش مستاهلة ومفيش ملايكة بشر كلنا فينا عيوب ولازم نتحمل بعض ولو للضروريات
دمت يا مهاجر ودام قلمك الذى يجعل مدونتى المتواضعى تشرق