ابغض الحلال ... بس حلال ,,, واحيان كتيرة بيكون اسلم حل !!! اه والله
يمكن كانت الناس زمان بتكرر ولغاية دلوقتى برضه شوية كلام كده زى ما يكون مورث مفاداه :
اللى عندها عيال ما تتطلقش .. استحملى علشان خاطر ولادك .. خراب البيوت مش بالساهل .. البخت الاولانى ما يتعوضش .. اعتبريه اخ قاسى ..عيشى لولادك وكأنه مش موجود .. حافظوا على الصورة قدام الناس وخلاص !!!
كلام كتير من هذا القبيل وعلى هذه الشاكلة وبصراحة كلام فاضى ومالهوش اى لازمة ولا حتى بيكون ليه مكاسب
وهقولكم ليه ..
لو الراجل او الست استحملوا علشان خاطر ولادهم وهما تعبانين .. يبقى مفيش حد فيهم هيقدر يريح اللى هو مستحمل علشانهم ... بمعنى
الست مش طايقة جوزها وكرهاه هتحس ان العيال هما سبب ربطتها بيه .. هتطلع غلبها فيهم .. يطلعوا العيال يا عينى معقدين ,, دا غير طبعا ان معظم الستات دماغهم ضاربة ورغايين ولما الست بتكون محروقة بيتفضفض كتير !!
يعنى هتمسك ودان العيال : ابوكم عمل وسوا وفيه وفيه وفيه .. والنتيجة ان نفسية العيال هتخرب
اما هيكرهوا الرجالة وعلى راسهم ابوهم اوهيكرهوا الستات واللى امهم منهم .
الاصلح ان اللى مش متفقين مع بعض او كارهين بعض.. يسيبوا بعض ... الجواز مش تحكمات وخناقات ولا قلة ادب وجر شكل ..
الجواز اتفاق بين اتنين على عيشة راضية وتنشئة اسرة كبيرة او صغيرة يكون كل افرادها متعاونين .. مش واحد يقول يمين والتانى يقول شمال ,, ولا واحد بيزم فالتانى من وراه !!
واللى مش قادر ولا عاجبه يبقى بلاها .... وزى ما ضحكتوا على بعض فالاول ورسمتوا المثالية واتجوزتوا بالمعروف
سيبوا بعض برضه بالمعروف بس على شرط :
ما تدخلوش ولادكم فمشاكلكم .. ولا تتعبوا نفسيتهم ,, لانهم مالهمش ذنب ولا كان ليهم رأى فى اختياركم لبعض
وبلاش تنسوا : امهم هتفضل على طول امهم .. وابوهم هيفضل على طول ابوهم
واهو مسيركم فيوم هتتجمعوا فجواز حد من ولادكم فبلاش تقطعوا كل الخيوط لانكم كده كده ولادكم رابطينكم ببعض.
هناك تعليقان (2):
اختىالرجعية
قد يظن البعض ان الطلاق اساسه حل المشاكل التى تدور فى فلك الزوجين وفك عروةهذةالزيجة بقدر المعروف كما بين القرآن الكريم ولكن هذا ليس نهاية المطاف
بل الحياة مرسوم فيها صور كثيرة اولى ان نراها بعيونا فالحياة متشابك فيها حلوها ومرها وليست القضية الاقدام على الطلاق
وهدم كيان اسرة وتشتيت الاولاد وهم الذين سيدفعون الثمن حتى ولم يتزوج ابواهما .
لان الدف الاسرى له عامل السحر فى تربية الطفل تربية سوية ولما تكون التضحية من اجل الاولاد ..بل الاجدر ان تكون التضحية من اجل الاستمرار .. وحتى لااطيل واسهب فى الكلام ,,,
فتكن القضية قضية البحث بكل حب عن النواقص التى تعترى الحياة الزوجية التى حماها الله وجعلها بالميثاق الغليظ ..
وغليظ بمعنى القوة ويصعف على الانسان بتره ...فاولى ان نراجع انفسنا دون ان نجعل للكبرياء باب وليكن الحوار والحب ايضاً .
اخى العزيز فيزو
انا سبق واتكلمت عن الجواز ومواضيع كتير واللى انا بقصده هنا .. انه عندما تستحيل الحياة الزوجية بين الطرفين فالاوقع هو الطلاق درأ للتأثير على نفسية الاولاد وحماية لهم وحفاظا على البقية الباقية من الروابط بين الام والاب فى فى وجود اولاد
تحياتى
اختك الرجعية ولى الشرف
إرسال تعليق