الأربعاء، 19 مارس 2008

صلبة .. جدعة .. قدها وقدود

مش عايزة اعمل اى حاجة لاى حد .. ولا عندى استعداد حتى انى اتكلم مع حد !!!!
بس مش قادرة !!!
صحبات بناتى مصاحبينى وحاجة غريبة جدا بتحصل معايا ...
كل اللى عنده مشكلة او متضايق من حاجة او بيفكر فموضوع يجيلى او يكلمنى زى ما اكون انا حلالة العقد والمشاكل او فايدى مفاتيح المقفل !!
مش هكدب واقول انى ما بعرفش .. لانى ولله الحمد بفكر كويس وعقلى شغال 24 ساعة من غير ما يفصل بس مش عايزة .
زهقانة .. حاسة انى عايزة ادخل فعلبة جوة علبة جوة علبة مقفولة وارمى المفتاح
واقعد مع نفسى قد 38 سنة كده كمان
بس امى هتوحشنى اوى مانا الراجل بتاعها ( هى دايما بتقول لى كده ) طب وبناتى
هبقى قلقانة عليهم !! واخواتى يوووووووووووووووووه مش هينفع
طيب اعمل ايه ؟؟؟
كنت فاكرة انى لما اندمج فى مشكلة حد هنسى اى حاجة وجعانى او هنسى اى مشكلة عندى !
وكنت فاكرة انى لو فضفضت هستريح بس عرفت ان الفضفضة بتوجع اكتر فبطلت وبقيت بدال ما افضفض افتح ودانى واسمع مشاكل اللى حواليا
وجعت نفسى اكتر وعودت اللى حواليا على انى الملجأ والملاذ وانا تعبااااااااااااااااااااااااااااانة .
والكل شايفنى صلبة .. جدعة .. قدها وقدود
وانا حاسة انى مخوخة .. بقيت حسانى هشة .. مشرخة وموجوعة
انا زعلانة مالدنيا كلها

هناك 5 تعليقات:

عمو يقول...

شكرا على مرورك على هناك :)
اية قى يابنتى الاكتآب دة مالك هيا الدنيا كدة
38 سنة ومش عارفة تلاعبيها
اوجدى للناس اعذار علشان تهونى على نفسك
على راى عمنا صلاح جاهين
انا قلت كلمة وكان لها معنيين
كما بطن واحدة وتوأمين زين زشين
لو دنيا شر الكوكب الخير يموت
ولو دنيا خير الشر هيعيش منين
عجبى
وأضم صوتى لصوت أمك انتى متربتيش غلط طبعا بس انتى من الناس اللى بتعدل كفة الميزان :) فاهمة طبعا!!!


على فكرةبالنسبالى :-
صوت الشيخ سيد النقشبندى هو اللى بيودينى للحالةدى

وكل سنة وانتى طيبة يام البنات
دة بكرة عيد الام
هتخرجى من العلب دى كلها لما اول واحدة تقولك " كل سنة وانتى طيبة يا
م ا م ا "
مبروك المدونة
وتحياتى

غير معرف يقول...

الف سلامه عليكي ربنا دايما معاكي
عبدالله

dreem يقول...

عمو
انا اللى اشكرك على مرورك هنا وكل سنة وانت طيب يا فندم والله يبارك فعمرك .. وهسمع كلامك واحاول اوجد اعذار للناس ولو انى عارفة مسبقا انه مش هعرف احيد عن الخطوط الواضحة بس اهو هحاول والله المستعان
تحياتى

dreem يقول...

عبد الله العزيز
الله يسلمك يا بيدو وربنا يخليك دايما وتسأل على وتدعيلى

غير معرف يقول...

تحيه مخلصه وتمنياتي بالتوفيق ودائما الي الامام
اشرف