الجمعة، 7 مارس 2008

ازاى نربى اولادنا ؟

ما تقولوليش كتب علم نفس ولا كتب تربية المراهق ولا اسس التربية لطفلك

تربية ولادنا مالهاش قانون !

ده اللى اكتشفته اثناء ما كان ولادى بيربونى .... اقصد اثناء تربيتى لولادى

مفيش نمط للتربية وخصوصا اننا بقينا فى زمن ما يعلم بيه الا ربنا .. ما علينا مالزمن دلوقتى

انا هتكلم عنى انا والعياذ بالله من كلمة انا

ربونى اهلى على الصراحة والاخد والعطا والنقاش والتفاهم .. ده طبعا بعد ما زرعوا جوايا شوية دين والحلال والحرام وايه اللى ينفع وايه الغلط وزودوا عليهم شوية ثقة بالنفس ولله الحمد .

اكيد كان فيه حاجات كتيرة انا ما عرفتهاش وما سألتش فيها بس مش هقول الا ان ده دأب السابقون

عملت انا ايه بقى مع ولادى او بالاصح بناتى ؟؟؟؟

مش هقولكم انى ما ربيتهمش بالطريقة ذاتها اللى اتربيت بيها لان لكل وقت ادان

بس فالحقيقة انا اخدت كتير من طريقة تربيتى وحذفت كتير برضه ... يعنى زى ما تقولوا كده عملت ابديت

مش عارفة انا كده صح ولا غلط !! بس الحمد لله ولغاية دلوقتى مفيش مشاكل او بمعنى اصح مفيش كوارث حصلت

يمكن وانا بقول يمكن اكون غلطت غلطة فى تربيتهم ولو انى شايفة انها صح بس كتير من اللى حواليا شايفنها غلط .. مش عارفة ليه ؟؟

الغلطة دى هى انى خليتهم ناضجين فكريا .. ده بصراحة زى ما ليه مميزات برضه ليه عيوب ..فمثلا:

شىء جميل انك تلاقى مراهقة بتتناقش معاك بكل جدية وليها رؤيتها الخاصة ورأى يحترم وفنفس الوقت بنوتة لذيذة بتهرج وتنكت وماشية عالموضة كمان .. بس يمكن ما يكونش حلو بالنسبة ليهم لما بيتعاملوا مع اقرانهم (اللى فنفس سنهم اقصد ) لانهم بيكونوا مع الاسف فارغين من جوة

(ما عندهمش مخ يعنى) . اما بالنسبة لى بقى فالوضع مختلف تماما : لانى وبدون ما اقصد خليت عندى انداد ..يعنى شخصيتين ناضجتين فكريا .. عندهم ثقة فنفسهم ومع الاسف عندهم مخ
يعنى مالاخر 3 ديوك عايشين فعشة واحدة ههههههه تخيلوا
بس ارجع واقول : انا اللى جبت دا كله لنفسى
ادعولى



























هناك 5 تعليقات:

hamssah يقول...

اسلوبك حلو قوي بس بتجري ليه
عايزين نعرف التفاصيل بقى
يعني مواقف بعينها مع المقارنه فيها بين تربيتك وتربيه بناتك
ربنا يوفقك همسه

غير معرف يقول...

أسلوبك جميل يا اخت دريم و حاسس إني قاعد معاك و شيفك و انت بتتكلمي موضوعات محسساني انك بنت مصرية أصيلة بكل لفظة و كلمة شخصيتك باينة في الكلام و كأنك كل البنات المصريات
كملي كتابة و أنا مستني باقي مقالات اللي على السريع
حلوة الففضضة ( التيك أوي ) دي
احكلنا عن أخر كتاب قرأتيه و عجبك أو رواية و لا انت ما بتقريش زي أغلب بنات مصر ... أوعى حد يضرب

dreem يقول...

ميرسى على كلامك الجميل
واه يا فندم انا مع الاسف غير كل البنات بحب القراية جدا واخر حاجة قريتها كانت مجموعة روايات احلام مستغانمى لو انت غاوى قراية ومش زى بقية رجالة مصر ابقى هات الروايات دى واقراها
تحياتى

سحساوي يقول...

على فكرة كلام جميل بس رفضك للكتب غير صحيح لأنك في حد ذاتك كتاب بتنقلي لولادك أفكارك و ثقافتك مش و لادك بس كل اللي حوليكي و الفرق بين الكتب الللي انت رفضتيها و بين ان الكتب مكتوبة لكن انت مسموعةو افتكري كلمتي كام واحد و وحدة على طريقة كويسة يحلوا بيها مشكالهم مع أولدهم
الكتب مهمةأيتها الكتاب المسموع

dreem يقول...

سحساوى
انا مش رافضة الكتب اطلاقا .. انا بس قصدت ان فيه حاجات بتيجى بالممارسات والتجارب
ماهو مش معقول بنتى تعمل حاجة غلط او اى تصرف واقولها استنى بس لما ابص فالكتاب واعرف اعالج الحكاية دى ازاى
ولا ايه ؟؟
واشكرك يا سحس عشت عشت وانا عارفة انك انت ههههههههههههههههههه