الأربعاء، 28 أبريل 2010

اااه يانى



اتغيرت نظرتى للناس صحيح ,, ما بقيتش شايفاهم كويسين الى ان يثبت العكس .. بس برضه مش شايفاهم وحشين الى ان يثبت العكس !
انا بس ما بقيتش استغرب او اتخض او حتى احزن زى ما كنت لما ما بلاقيتش المتوقع .. العادى والطبيعى .
يعنى بقيت فاهمة ومقتنعة ان اللى كنت بعمله وطريقة تفكيرى هى الغباء بعينه ... انى انتظر من اللى قدامى انه يبقى زييى .. يتعامل معايا بنفس الطريقة اللى بتعامل بيها !
كلنا مختلفين عن بعض فى كل حاجة حتى ولو كنا متفقين فى الاساس ॥( الصح والغلط والعيب والحلال والحرام) واللى بتنتاوله بطريقة مختلفة .. كل واحد فينا بيفلسفه وبيستطعمه ويحسه ويتعامل بيه بطريقة غير التانى ।
الاخوات اللى اتربوا فى نفس البيئة وشاتلهم نفس البطن مختلفين عن بعض ,, يبقى ليه انا استنى ولا اطلب من ايا كان انه يبقى زى ما انا حابة ؟
ريحتنى الحكاية دى بس كمان تعبتنى !
بقول لنفسى ده وضع طبيعى صحيح بس ماهو كان الاكثر طبيعية والاصح ان الناس تتعامل بوضوح ونقاء وصفاء وكأنهم بيعاملو نفسهم .. مش الصح اننا نعامل الناس كما نحب ان يعاملونا ؟
وارجع اقول : ماهو مش كل الناس بتكون امينة مع نفسها ومش كل الناس بتحاسب نفسها وفيه كتير اوى عايشين كده ومقضينها .
فعلا لله فى خلقه شئون

هناك 6 تعليقات:

همس الاحباب يقول...

ربنا يصلح الاحوال ويهدى النفوس

ازاى حضرتك والبنات يا رب تكونوا بخير
تحياتى

فضفضه يقول...

السلام عليكم
كنت زيك بنتظر ال ادامى يكون زيى ومعامله مثل معاملتى واخلاق وادب واحترام واحساس وتقدير مسئوليه وعمل الخير لله وعدم انتظار مقابل وتقديم مساعده وارشاد للخير وللصح والنية الصافيه والروح الحلوه والقلب المسامح والتماس الاعذار .....والخ
ولكن زى ماقولتى مش كل الناس أمينة مع نفسها وبتحاسب نفسها
الحمدلله اننا غيرهم ونختلف عنهم
معلش مضايقيش نفسك وياما هتشوفى
تحياتى لكى

أليس في بلاد العجائب يقول...

مع الوقت
مبقتش اي حاجة غريبة تحصل غريبة
بقت عادي
كلمة عادي بقت الرد علي كل واي حاجة تحصل كنتي زمان تستغربي او تستنكري او تتخضي من مفاجأة .. دلوقتي بقت كل حاجة
عادي


تأقلم وتعايش دا ؟
ولا استسلام وانهزام؟
حتي الاجابة علي دول ايا كانت

عادي :)

dreem يقول...

همس الاحباب
ازيك يا خالد ان شاء الله تكون انت واسرتك بخير
احنا الحمد لله تمام .. فضل من الله
دعواتك

-----------
فضفضة
وعليكم السلام ورحمة الله وبركاته

اوعى تكونى اتغيرتى
شوفى : انا فعليا اتعودت ومع ذلك لسة بتضايق ,, من شوية واثقة فالمطبخ مع بنتى وبنتكلم عن صحباتها لقيتها بتقولى انتى ليه ما بقيتيش طايقاهم .. قلتلها انا بس مش عارفة ليه ما بنتعاملش زى ما بنعامل ؟ ليه الخبث واللف والدوران ؟
قالتلى انتى بتقولى كده وانتى مش فالموضوع امال انا احس بأيه !
ما تتغيريش خليكى زى ما انتى حتى لو حسسوكى اللى خواليكى انك شاذة
طمنينى عليكى دايما

---------------

أليس
مش عارفة ليه انا بحس كتير بأنك ملفوفة بالحزن .. بتوجعيلى قلبى بجد
واوعى تردى وتقوليلى عادى
ربنا يشرح صدرك وينور لك بصيرتك
تحيتى وحبى

واثقة بربها يقول...

مع الوقت كل حاجه بتتغير و الناس كمان بتختلف عجبنى تحليلك للناس و نظرتك ليهم "ما بقيتش شايفاهم كويسين الى ان يثبت العكس .. بس برضه مش شايفاهم وحشين الى ان يثبت العكس !" حاسه ان ده الصح

dreem يقول...

واثقة بربها
ازيك
انا عجبنى انه عجبك ههه
نورتينى واسمك حلو اوى
تقبلى تحيتى