الأحد، 21 ديسمبر 2008

انا والغسالة

بما انى ست نضيفة الحمد لله
وبما انى مقتنعة ان نضافة الست بتبان من المطبخ والحمام
فاتعودت من زمان انى اشطب المطبخ قبل ما انام
ولغاية كده حلو الكلام ومفيش مشكلة
قوم اييييه
قوم انا ادخل المطبخ وهوبا اعبى الغسالة (غسالة الاطباق ) وده بعد ما حضرت لغدا بكرة وقشرت التوم (هوايتى المفضلة ) وخلاص دخلت اوضتى استعدادا للنوم ومطمنة ان الغسالة هتقوم بشغلتى (غسيل المواعين ) واذ فجأة جالى هاتف يقولى قومى ادخلى المطبخ
قوم ايييه
اقوم انا اتمخطر ألاقى الدنيا غرقانة مية !!
يا ليلة ليلاء
خرطوم الصرف بتاع الغسالة فط من مكانه واترمى فالارض والدنيا غرقت المطبخ والريسبشن والسجاد واوضة البنات
اتنح انا طبعا واقول وماله حلو وجميل والحمد لله انها جت لغاية كده
واجيب الجردل والكويزر (الشرشوبة يعنى ) وابتدى الم المية
الاقى ايييييييه ؟
الاقى انى لو استمريت كده هخلص بكرة الضهر
رحت ايييييييييييه
رحت جايبة الفوطة ورجعت لطريقتى القديمة واديها يا بت لم المية ومسح بالفوطة
وادينى خلصت اهه يادوب على صلاة الفجر
والله غسالة بنت حلال
نتعلم ايه بقى من الحكاية دى
نتعلم اننا ما نتكلش عالغسالة وكل ما حاجة تتوسخ نغسلها ونخلص
كانت معكم اختكم المهدودة مالمسح
دريم
اااااااه يا ديسكى

هناك 16 تعليقًا:

Mafrousa يقول...

معلشي
تعيشي و تاكلى غيرها
و ده ان دل يدل على ان النضافة مش اوي كده
يعنى لو تعبانه و مش ليكي مزاج تغسلي الاطباق
ممكن تسيبيهم للصبح و لما تقومي حتلاقى نفسك فريرة بتغسليهم
معلشي المرة الجاية اتأكدي ان الخرطوم مش يهرب من مكانه

Mony يقول...

ههههههههههههههههههه


تعيشي و تاخدي غيرها يا دودو

وسلامة ديسكك يا جميل

dreem يقول...

واحدة مفروسة
ازيك يا اوختشى عاملة ايه
بصى بقى انا من سنين كتيرة كده لما كنت صغننة كنت بحب اسمع الى ربات البيوت
وكانوا مستضيفين مش عارفة مين كده وسألوها الست النضيفة تتعرف منين ردت وقالت الست مطبخ وحمام
ومن يومها يا اوختى لو انا بموت لازمن ولابد المطبخ يتشطب قبل النوم وبالمرة بنضف البيت كلهوماحدش بياكلها بالساهل
نورتينى يا قمر

dreem يقول...

مونى
بتضحكى ياختى
اضحك الله سنك وهناكى
والله يسلمك يا شابة
بوسيلى لولو وبيدو

mostafa rayan يقول...

معلش المسح للجدعان بردو
ههههههه
بضحك معاكي
ويلا بقي سلام

dreem يقول...

مصطفى ريان
اضحك ياعم اضحك
ومادام المسح للجدعان ما تقوم تمسح
بس بالفوطة وياريت تستنى قبل الفجر بشوية كده علشان ترصرص مالبرد ههههههههههههههوانا اللى هضحك عليك ساعتها يوووووه اقصد معاك
تحياتى مصطفى

غير معرف يقول...

ياعينى عليكى

من الكلام بس .. والشعور اللى اتنقل لى حاسس انى ارهقت ومش قادر اروح الشغل

نفس الموقف للمفارقة حصل عندنا الاسبوع اللى فات .. الغسالة كلها شالوها لأنه الراجل ماعرفش يصلحها مكانها .. قوم نطلع من ده بإيه؟

ان لازم ست البيت حتى لو كان فيه حد بيساعدها .. لازم تكون عينيها عليه .. غسالة.. شغالة.. أى حد

تحياتى لبوست رائع .. وأسفى الشديد لتعبك

dreem يقول...

شريف
سلامتك يا فندم من الارهاق ولا اقولك : فرصة وخد اجازة ههههههههههه
وبالنوسبة لموضوع الغسالات فأى خدمة يا فندم انا اعرف ناس حرفية جدا فى تصليح الغسالات والبوتاجازات وكل حاجة اخرها ااااااااات يعنى اختك شوية شوية هتبقى بلية لو محتاج حد للتصليح أأمر بس اكتبلك ارقام تليفوناتهم وابقى ادعيلى
سعدت بمرورك ياشريف وربنا يبارك لك فيما اعطاك ودمت اخ غالى
كل التحية

انا حره يقول...

انا مش عارفه ليه بخاف اشغل اى حاجه كهربائيه وادخل انام

حتى الغسيل بخاف اشغل الغساله واسيبها وانام بحس ان ممكن لاقدر الله حاجه تحصل

وبعدين موضوع غسيل الاطباق مش محتاج غساله يعنى دول كام طبق بنطلع غيظنا فيهم ولا نسرح كدا ف اى موضوع على مانخلصهم وخلاص

dreem يقول...

انا حرة
بتخافى من ايه يا اوختى خليها على الله
وبعدين انا الكام طبق مش هيكفوا علشان اطلع غلبى فيهم واهو السرحان شغااااااااااال طول اليوم لما دماغى كلتها البارومة
نورتينى يا حرة
ألا صحيح انتى حرة فعلا ولا دى امنية ؟؟
تحياتى

Eyzinhyem يقول...

قوم ايييييييييه
تنشرى السجادة فى البكونة
وتلاقى اييييي؟
الجيران بيشتكوا علشان المية بتنقط عليهم
قوم اييييييييه
وتلاقى ايييييييه؟
قوم اييييييه
وتلاقى ايييييييييه؟
..
..
.
.
بجد جامدة

dreem يقول...

Eyzinhyem
ههههههههههههههه
ضحكتنى بجد
بس صحيح صحيح انا ما عرفتش اقرا الاسم ونقلته زى ما هو بالحرف
ألا ليه كده ؟؟
اهلا بيك ونورتنى يا فندم
قوم اييييييه
تقبل تحياتى

انا حره يقول...

تقدرى تقولى بفشر عليكم او ياعينى مش قادره ابقى كدا فالواقع فجايه اعملهم عليكم هنا بقى ههههههههههه

dreem يقول...

انا حرة
مش فاهمة انتى كاتبة بفشر ولا ايه ؟؟
بس ما علينا
اهلا بيكى

سحساوي يقول...

بردو و ولاد الناس ولاد ناس
أول ما يتعلموا يتعلموا في الكيك
عقبال البامية و تقشير البصل

dreem يقول...

سحساوى
يسمع من بقك ربنا يا اخويا حتى عالاقل ارتاح انا ههههههه