الأحد، 1 يونيو 2008

امى

قلت بقى ما دمت انا دخلتكم حياتى وحكيتلكم عن الاوانيس بتوعى وابويا رحمة الله عليه يبقى بالمرة اكلمكم عن امى .
يمكن انا وامى ما كناش اصحاب زمان واعتقد ان ده بسبب ان البنات فالغالب بيميلوا لابوهم اكتر وكمان انا نمرة 3 فى الترتيب وسبحان الله نمرة 3 ده فالغالب بيكون كمالة عدد هههههههه
ما اطولش عليكم فضلت كده لغاية ما اتجوزت ( مش كمالة عدد اقصد فضلت كده مش مصاحبة امى ) و ما تتخضوش اوى كده ما أنا ما طولتش و اتجوزت وعمرى 19 ونص بالتمام والكمال يعنى مش كتير اوى
المهم ,, بعد الجواز بقينا اصحاب اوى بس مش مرة واحدة لا بالتدريج !
مش عارفة سبب القرب ده بالتحديد ,, يمكن لانى حسيت بيها ولا يمكن لانى بقيت ام
الله اعلم بس للحق الصورة اختلفت بالنسبة لى تماما
عاملة ازاى بقى امى ؟
طيبة وحنينة لاقصى درجة وشايفة ان الدنيا كلها حلوة والحب جميل والناس كويسين صوتها رقيق وواطى عكس اخلاقها الحقيقة
خدومة وجدعة وحمولة ومثقفة لاقصى درجة وعندها لمسة فنية مالهاش حل
خطها حلو ورسمها حلو ومستحيل حد يمل منها
لما بتتنرفز بتقول كلمتين : نو وايه اللى بيحصل ده هههههههههههه
وياسلام بقى وهى بتقول نو تحفة بجد ودايما اتريق عليها واقولها يابنت سلطح باشا بترطنى
ليدى .. امى ليدى حقيقية ومش بقول كده لانها امى والله بس هى بالفعل كده
شيك جدا ورقيقة لاقصى درجة تحسوا انكم بتتعاملوا مع بنى ادم نضيف من جوة وبره
المهم بقى بقينا اصحاب ولو اننا من زمان وعلى الرغم من تعلقى بأبويا الا انى كنت بحكيلها على اى حاجة بتحصل لى لانها عودتنا على كده .. يعنى لو حد عاكسنى وانا ماشية لا قدر الله ولا حاجة ويمكن دى الحاجة اللى استمرت من زمان لغاية دلوقتى (ما اقصدش المعاكسة برضه)
يمكن اللى زاد انى بقيت احسها جدا .. اعرف هى تعبانة ولا لا من صوتها عايزة اقولكم انى لما بروح معاها للدكتور انا اللى بقوله هى بتشتكى من ايه لانها ما بتعرفش تعبر
والغريب انها معايا كده بتحسنى !
نعمة امى ربنا يديمها علينا يارب كتير بدعى ربنا ياخد من عمرى ويديها مش سيدنا ادم عمل كده ؟
مالهاش طلبات يا عينى .. عايزة تدى وبس وبتحاول تريح الكل
مش حماة ولا تعرف تكون حما ودايما اقولها انتى عبيطة مش عاملة زى الحموات
(واقرى يا مفقوعة مرارتك) تقولى دى زيكم وانا بعامل ربنا وطبعا اتكتم انا .
علاقتها بالاوانيس بتوعى او بولادنا كلنا بقى مش هينفع اوصف .. بس ممكن اقولكم ان البنات بيحبوها اكتر منى واصحابها جدا وطبعا زى ما شالوا الالقاب معايا كتير بيشيلوا الالقاب معاها وياسلام بقى لو انا اتخانقت معاهم وماما عرفت اسمع موشح ذم فيا وقصيدة شعر فالبنات وبيكون ردى المعتاد هما دول ولادك انتى وانا بنت مين بالظبط .. بنت البطة السودا ؟؟ ترد عليا وتقولى : انتى عنيا اللى بشوف بيها
اتكتم انا
امى شجعتنى فى حاجات كتير اوى ... دخلت الجامعة وكملت بفضلها وتشجيعها لا وايه كمان درست اللى انا حباه واللى هو ليسانس لغات وترجمة اسم الله عليا هههه
صحيح ما عملتش بيه حاجة ( اللى انا درسته اقصد) بس عارفين كان حاجة كده عاملة زى التحدى وده بقى موضوع يطول شرحه .. عايزة اقولكم انى تقريبا طول فترة الدراسة كنت بغنى اغنية واحدة بس ... لالالالا اغنيتين بصراحة وهما بس من غير تريقة : قلنا هنبنى وادى احنا بنينا السد العالى ودى كنت بقولها وقت الدراسة
وخدنا اجازة خدنا اجازة ودى كنت بغنيها فى اخر يوم امتحان
واتبنى سدى العالى بفضل امى ولغاية دلوقتى الاجازة بقضيها عندها ومعاها واللى بحس انى رايحة افضى كل الوجع وارجع تانى عيلة صغيرة مسئولة من مش مسئولة عن ( شوفتوا حرف جر بس يتغير بحرف تانى يغير حاجات كتير) وكمان بالمرة اشحن
علشان اعرف اكمل .
ربنا يخيها امى ويديلها الصحة والله مانا عارفة اعمل لها ايه ولا اعمل معاها ايه ؟
ادعولها
دمتم




هناك 6 تعليقات:

خمسة فضفضة يقول...

السلام عليكم ورحمة الله وبركاته

ربنا يخليهالك يارب ومايحرمكوش من بعض
دي اول زياره ليا هنا وخدت جوله سريعه كده في المدونه ماشاء الله جميله جدا

بس مش عارفه ليه حسيت انك بتكبري نفسك زياده عن اللزوم ،انت ماشاء الله لسه في عز الشباب و38 سنه دي ماتعتبرش سن كبيييره اوي زي ما انتِ بتحسسينا في كتاباتك

dreem يقول...

خمسة فضفضة
وعليكم السلام ورحمة الله وبركاته
الله يخليكى ويخليلك اللى ليكى .. انتى نورتينى

شوفى انا مش بكبر نفسى ولا حاجة بس هو ده واقع الحال عندى عروستين طولى .. وخلاويص بقى ياللا حسن الختام ولا عايزانى اقولك يعنى : لو قيس عمرى بطول أيام عذابى لكنت اطول الناس عمرا !
تحياتى واشكرك مرة تانية

KHALED يقول...

خسارة أن الواحد يضيع وقت فى دراسة مايستفدش منها وياخد الموضوع على أنة شهادة أو تضيع وقت .. معلس أنا قاسى شوية بس مش مواف على تضيع وقت على الفاضى فى دراسة مهمة ذى دى ..
سلامى لمامتك .. وقوليلها خالد بيسلم عليكى و بيرفعلك القبعة

Mony يقول...

ربنا يخليلك مامتك و يباركلك فيها

بس اتجدعني و خليكي بارة جامد اوي بيها علشان يتردلك من بناتيتك

كوارث يقول...

جميل قوي احساسك ده
ربنا يخليها يا رب ويخلي امى و كل الامهات ويديهم الصحة وطولة العمر
بوست جميل
انا هنزل قصة عن الأم - ليا انا مش بتاعت مكسيم جوركي - قريب على مدونتي باذن الله
بدعوكي للزيارة !
شكرًا

dreem يقول...

خالد
يوصل سلامك يا خاللود وبالنسبة لحكاية تضييع الشهادة فدى وجهة نظر
تحياتى
**********************
مونى
ربنا يخليكى ويخليلنا امهاتنا وانا من ناحيتى بحاول ولو انى مهما عملت مش هكفيها ومش علشان يتردلى والله ولكن لانها تستحق .. نورتينى واشكرك
****************************
كوارث
هبقى اقرا اللى هتكتبه ان شاء الله بس ما قلتليش عملت ايه فالامتحانات ؟
ربنا يوفقك وتقبل تحياتى
**********************