الخميس، 18 نوفمبر 2010

من حكايات زوجة ثانية


لما قبلت انها تكون الزوجة التانية ليه فالسر قبلت بس لانها حست انه من حقه انه يحافظ على بيته اللى فيه عياله وحقه انه يكمل نواقصه يعنى يحب ويتحب ويسد الخروم اللى موجودة فحياته !


كانت بتسعى جاهدة انها تسعده وتحافظ على بيته واستقراره , يعنى تجيب له البريفيوم اللى بيستعمله علشان ريحته ما تبقاش متغيرة , تدور يمكن تكون شعرة منها لزقت على هدومه , ما تطلبش منه لقاء ولا تتصل بيه ولما كان يشتاق لصوتها ,, يتصل بيها من تحت البطانية وتفضل هى تتكلم وهو يادوب يدوس عالزراير قال يعنى بيرد عليها !


لما كان يكلمها عالنت من بيته كان بيقول لمراته انه بيكلم دكتور فيل وتقوم هى تغير الاى دى لدكتور فيل وكمان تحط له صورة علشان مراته ما تحسش بحاجة !

كانت بتفكر له طول الوقت

فى مشاكله مع مراته وفمصلحة ولاده

وكانت بتحاول ترضيه بكل الطرق

وبالفعل ابتدت دنيته تتظبط ووقتها

حس انه كداب كبير ومش قادر يستمر فالكدب على مراته ولا على اللى حواليه وقالها انه تعبان ومش قادر يستمر وعايز ينفصل

حايلت شوية وبعدت شوية وزعلت شوية وبعدين عملتله اللى كان عايزه وراحت قابلته عند المأذون واتطلقوا

حبته هى ؟

اه يمكن لانها طلعت معاه مخزون عواطف شايلاها من سنين

ومع ذلك وجعها وداس عليها ونسى كل اللى عملته معاه وعلشانه !

دلوقتى اكتشفت انه يستحق بس

حياته اللى عايشها

هناك 6 تعليقات:

أبو كريم يقول...

أولا كل سنة وانتى طيبه

تعليقى

إن كان وجودها فى حياته كزوجه ثانيه تظبيط لحياته من منظورها فالعكس كان من منظوره لأنه حس انه بيخون مراته برغم كل ده

وإن كان وجوده فى حياتها جعلها تطلع معاه مخزون عواطف شايلاها من سنين ويمكن تكون حبته برغم انه جعلها شبح فى حياته فبالعكس لو كان فعلا اخدها كزوجه تسد الخروم الى فبيته الأول كان أظهرها من مخبأها وأعلنها للناس ولمراته


تحياتى

فاتيما يقول...

دريمو

انا مش عارفة اعلق واقول حاجة
البوست صادق قوى
وكل حرف فيه بينطق
بيقول كتير
مؤلم
وحقيقى قوى

لو فيه حكايات كمان
يا ريت تكتبيها
ومتبطليش

بوسيلى البنات
وخلى بالك من نفسك
على قد ما ينفع

dreem يقول...

ابو كريم
وانت طيب وعيد سعيد عليك
وجهة نظرك وتعليقك موضع احترام ولكنى اؤمن ان الناس ما تقدرش تحكم على بعضها الا بالاحتكاك المباشر والعشرة

تحيتى



------------------

فاتيما

ما تعليقش يابطة
كل سنة وانتىطيبة وسعيدة وراضية بما قسمه الله لكى
بيووساتك هتوصل ومخلية بالى من نفسى اهه
وحاضر يا بطوطة انا هكمل الحكايات علشان خاطرك هههههه

سحساوي يقول...

جميل انها بدأت تبوح اعتقد انا بدأ العلاج

غير معرف يقول...

تصدقي انا زوجة تانية وتقريبا كل اللى قولتيه بعمله ودلوقتى حاسة انى مصيري هيكون زى قصتك وده ببساطة لانى حاسة انى بملا وقت فراغ مبقاش زواج ومسؤلية وحب لاء مجرد بملا وقت فراغ لغاية ما الهانم تفضا له وفى النهاية هو كسبان وهى كسبانة واحد حاسس بالذنب كمان تجاهها وانا بقى اوت خسرااااااااااااانة لاء وكسبت لقب مطلقة

dreem يقول...

الغير معروفة
انتى اتطلقتى بالفعل ولا لسة ؟
ابعتيلى ميل او اكتبى باستفاضة وانا مش هنشر اللى انتى هتكتبيه
ما تزعليش .. ربنا خير مخلف معوض
تحيتى