الأحد، 12 أبريل 2009
عريس يا بوى
شفتم اللى حصل ..
مش بنتى جالها عريس هعهع
قال ايييه جارة أم زميلتها فالجامعة شافت صورتها والا تاخدها لابنها والست تتصل بيا وتقعد تحكى وتتحاكى فى اوصاف العريس وانا كل اللى طالع عليا .. يا حبيبتى بنتى لسة صغيرة ,, تقولى على ما تخلص بعد سنتين .. اقولها بس برضه صغيرة .. تقولى ماهى بنتى قدها واهى اتكتب كتابها واقول لمين وافهم مين مفيش فايدة
ان جيتوا للحق يعنى ... أنا اه ممكن اكون اتبسطت علشان بنتى كبرت وبقوا يجيلها عرسان بس الاكتر قلبى وجعنى وقلت فعقل بالى يالهوىىىىىىى التحويشة اللى بحوشها هتتاخد منى
وش بيعيط
خلصت انا من الموضوع بكل دبلوماسية وقلتلها لما اقول لابوها الاول وقد كان
والراجل ربنا يخليه ياااارب قالى الموضوع ده مرفوض نهائى لغاية ما تخلص دراستها قلتله قشطة عليك والنبى هههههههه وادينا العريس استمارة ستة
البنات كبروا ربنا يحميهم وكبرونى معاهم ولاد الفرطوس
فوتكم بعافية
الاشتراك في:
تعليقات الرسالة (Atom)
هناك 15 تعليقًا:
ربنا يخليها لكى وان شاء الله تتجوز الايستحقها ويسعدها
امبارح كان عمرى عشرين
ربنا يخليك ويبارك فيك يارب .. وربنا يسمع منك
أيوه كده صح برافو عليكى
و باباها كمان عنده كل الحق ..
ربنا يفرحكم بيها و بعيالها اٍن شاء الله ..
بس البنت رأيها أيه و لا ماحدش قالها ؟؟
عمرو
ماحدش قالها ازاى يا عمرو وزميلتها فالجامعة هى اللى جايبالها المحروس
اما عن رأيها فهى ما تعرفوش ولو ان الفضول كان قاتلها علشان تشوفه بس انا قعدت قلتلها الاتى : حلو انك تبقى مرغوبة والناس تخطب ودك بس الارتباط دلوقتى انتى ما تقدريش عليه لان مشاعرك لسة ما نضجتش وهى مقتنعة بالكلام ده من زمان بصراحة وكتير بتردد انها عايزة تحقق حاجة بعد الدراسة .. ربنا يوفقها وينور بصيرتها يارب هى واولادنا جميعا
دعواتك يا عمرو
تحياتى
حضرتك بتفكريني بماما لما حد كان يتقدملي كل الامهات احساسهم متشابه فعلا ربنا يخليلك بناتك يارب ويرزقهم ازواج صالحين
انتى خايفه تعجزى
ويبقى اسمك ماما ستو
صح؟
عاشقة الرومانسية
وليه الاسئلة المحرجة دى هههههههه
ثم هو انا محتاجة ابقى ماما ستو علشان اقول انا عجزت
طب انا عجزت .. وش بيطلع لسانه هههه
تحياتى
حاسوباتية
ربنا يخليكى لمامتك ويخلى مامتك ليكى
كل التحية
ربنا يهديها و يكملها بعقلها هى و كل بناتنا و أولادنا ..
الزمن ده بقى صعب أوى و الله ربنا يحميهم ..
الطم ولا الطم
هو فيه عرسان دلوقتى
يختى جوزيها
احنا فى مرجله انقراض
تتخيلى بعد سنتين هتلاقى
سبونى
اصوت
انتى تلاقيكى خايفه تتجوز وتجبلك بنبينو يقلك يا تيييييييييييييييته
ههههههههههههههههههههههه
وتبقى جده بالرغم انه مش باين عليك اصلا ولا هيبان خالص
هههههههههههههههههه
وحشانى جدااااااااااااااااااااااا
همس
تلطمى ليه يابت يا خايبةهههههههه
دا مجرد عريس عبيط عايز يتجوز بنتى اللى لسة عندها 19 سنة ..
بعد سنتين ولا 10 سنين ,, كل واحد رزقه متشال له
انتى كمان وحشتينى يا مزة .. جيتى مالكويت ولا استحليتى القعدة هناك ؟
طمنينى عليكى
وبعدين ياختشى هو انا اطول يبقى عندى بيبى ومن مين .. من البيبى بتاعتى
يااااااه دا انا ابقى سعيدة اوى
يا مين يعيش
حضن وبوسة
أجمل ما في الدنيا أبناؤنا ، و أصعب ما فيها هم لأنه الساعة التى نعرف بها أن الوقت قد تقدم
تحياتي
يانهااار
انا فاتني كل ده
معلش يا اختشي سامحيني والله مش بقعد كتير اليومين دول
مبروك مبروك لبناتك يا قمر
بس لا تقلقي يا قمر
المثل بيقول يا بخت من جابت بناتها قبل ولادها
علشان البنات مش بتكبر خالص
بس ماتقاطعيش علي البنات يا دودو
اذا جائكم من ترضون دينه و خلقه فزوجوه
و سنتين الدراسه كافيين انهم يتعرفوا علي بعض فيهم
عموما عريسها عندي
ادو
اهه هيستناها لما تخلص و تشتغل
و تعمل كل اللي نفسها فيه علي ما يكبر و يكون نفسه
سحساوى
اتفق معك ان ولادنا هما اجمل حاجة فحياتنا بس مش بسببهم بنعرف ان العمر تقدم ,, الشعور بتقدم السن احساس ,, مجرد احساس
تحياتى
مونى
ولا يهمك يا مزة ,, المهم انك تمام واتفقنا على ادو بس مش شايفة اننا كده هنظلم الواد ؟ ههههههههههه
بوسة وحضن
إرسال تعليق