الاثنين، 29 سبتمبر 2008

رغى

كنت امبارح قاعدة بتكلم مع اصدقاء فى مواضيع مختلفة وكلام يجيب كلام وموضوع يجيب موضوع لغاية ما وصلنا للجواز والرجالة والستات وكأن الدنيا ما فيهاش الا مشاكل المتجوزين وسوء التربية للراجل والست والسوء هنا المقصود بيه النقص والجهل فى طريقة التعامل ومش قلة الادب طبعا .
من خلال الكلام اقترح الصديق القيام بثورة للتصحيح فى مفاهيم العلاقة بين الراجل والست ولقيتنى برد عليه وبقوله : لو الرجالة عملوا ثورة الستات هتعمل ثورة هما كمان والدنيا هتولع !
ولو راجل عمل ثورة فبيته هتتعدل الست يومين تلاتة وبعدين هترجع تتعوج تانى ونفس الحكاية بالنسبة للراجل
القصة يا عزيزى انها تربية وعادات بقت متوارثة ومن الصعب جدا تغيير المفاهيم
اتناقشنا وهو مصمم على ان التغيير من السهل حدوثه وانا مش مقتنعة .. يمكن بس اللى انا مقتنعة بيه اننا ممكن نربى ولادنا صح ونعلمهم صح والتعليم هنا مش فالمدرسة ولا الجامعة ولا طبعا تعليم الطبيخ واللغات والكمبيوتر مع ان الحاجات دى مطلوبة اكيد
المطلوب اننا نعلم ولادنا يبقى حلوين من جوة نعلمهم الحب والتفاهم وتشغيل عقلهم
ولو سألتونى زى ما اتسألت انا امبارح انتى ربيتى بناتك ازاى هرد بنفس الطريقة واقول ما اعرفش انا عملت معاهم واتعاملت معاهم بكل المحظورات ...
شتمت قدامهم وشتمتهم وضربتهم وخاصمتهم ووثقت فيهم وفتشت وراهم ودخنت قدامهم وصليت قدامهم واتكلمت فالدين والحلال والحرام واتكلمت عن الجنس ورقصتلهم ورقصت معاهم وعيطت ليهم ومعاهم
يعنى مالاخر ما خليتش حاجة ما عملتهاش معاهم ولا موضوع محظور الكلام فيه وما خليتهمش يلجأوا لصاحبة او لودن تانية تسمعلهم ولا يحتاجوا لنصيحة من حد .. بس برضه ما استحوزتش عليهم وحرمتهم من حياتهم ولا اتحكمت فيهم !
انا بس حبيتهم وعيشتهم بكل لحظة عدت فى حياتى
وابدا ابدا ما شيلتهمش من ابوهم زى ما ستات كتيرة للاسف بتعمل فعيالها
ولا عقدتهم من الرجالة وقلتلهم الرجالة زفت وهباب زى ما برضه كتير من الستات بتعمل
علمتهم يحكموا عقلهم ومشاعرهم لما ييجوا يحكموا عالبنى ادمين
اديتلهم الثقة وعلمتهم ما يخافوش علشان ما يكدبوش
كبروا الحمد لله ولسة بيكبروا وان شاء الله هيكبروا وهيقعوا ويقوموا وهيتخبطوا ويتجرحوا ويتعوروا وهيتعاملوا مع الكويس والوحش بس المهم انهم حلوين من جوة .. اساسهم حلو ولازم الحلو يكرمه ربنا
وده اللى لازم نعمله مع ولادنا
كل سنة وانتم طيبين

هناك 7 تعليقات:

هانى زينهم يقول...

اجمل حاجة القرب من الاولاد وخصوصا من الام لانها هى اللى بتزرع جواهم كل القيم الجميلة وربنا يفرحك بيهمو كل سنة وانت طيبة يا وربنا يعيد عليكى الايام بخير انت والاسرة وكل اللى بتحبيهم وعيد سعيد .

الباحث عن الحقيقة يقول...

الله
هو ده الكلام
نتعلم نكون حلوين من جوه
نربي الاجيال على المحبة والفضيلة وحب الاخرين ومشاركتهم ومساعدتهم
نربي ابنائنا انهم مايكونش عندهم كلاكيع من جوه ويعبروا عن رأيهم بصراحه
نربيهم باننا نشاركهم ونخليهم يشاركونا في مسئوليات الحياة علشان لما يكبروا يقدروا يتحملوا

بقى بتدخني قدامهم يا مدام كليوباترا
ماشي يا ستى
كان معكم الباحث عن الحقيقة مراسل محافظة فيصل

dreem يقول...

هانى
اشكرك يا هانى وربنا يتقبل منك ولك مثل ما دعوت وكل سنة وانت طيب

*****************
الباحث
وهنا رقدت جثة لشاب مطموسة المعالم وكأنه تعرض للعنة الفراعنة !!
روح يابنى ربنا يسترها عليك ههههههههه
نورت ياباحث

KHALED يقول...

كل الكلام دة جميل بس كان لازم تاخدى بالك من حاجة مهمة ......
إنك بانسبالهم مثل أعلى ودة حايتعبهم شوية خصوصا لو كانوا زيك دماغهم جامدة يعنى مابتعديهاش بالساهل
مش كدة ولا أيـــــ(0)ـ(0)ــــــة

طبعا دة موش عيب بس بيتعب صاحبة

عيد سعيد يا صاحبى

dreem يقول...

خالد
كل سنة وانت طيب يا فندم
وكلامك صح فى انى مثل اعلى بس تعرف انا ما اعرفش ازاى انا ربيتهم كويس لدرجة انهم بيقومونى لما بعمل حاجة بايخة او شكلها وحش دى حاجة
الحاجة التانية بقى انهم فعلا دماغهم جامدة بس حلوة واهى هتنفعهم لانهم لما بتعبوا شوية ان شاء الله هيسترحيوا بعد كده على طول
ولا ايه يا صاحبى ؟؟
حمد الله على السلامة وعيدك سعيد يارب

mahasen saber يقول...

كلام حضرتك مضبوط التربيه هيا الاساس معناس كتير ...بس فيه شخصيات بطبيعتها التربيه مش بتنفع ولا بتاثر فيها يعنى فيه راجل يطلع فى بيت عمر ما الام او الاخت اتهانت ولا ا اتعاملت غلط وبالرغم من كده اول ما يتجوز كانه كان فى معتقل وعايز يطلع عقده على مراته من ضرب الى اخر سلسلة قلة الادب....
بس بالنسبه لتربية حضرتك لبناتك انا طموحى فى تربيتى لابنى اننا نبقا اصحاب كده وقريبين لبعض بالشكل ده وانى اشيل اى حاجز بينا عشان يوم ما تدايقه الدنيا يلاقينى صاحبه وامه وصاحبته واخته ومرات خاله كمان...
ربنا يباركلهم فيكى ويباركلك فيهم ويفرحكم بعض وتدخلوا بعض الجنه...
ان شاء الله
وكل سنه وحضرتك والانانيس بالف خير وصحه وسلام وستر..

dreem يقول...

محاسن
كل سنة وانتى طيبة الاول
ونيجى بقى لتعليقك ومن غير زعل هه
انتى لازم تسامحى ومهما حصل معاكى دا لو انتى عايزة تربى ابنك صح وتبقوا اصحاب صح وتشوفيه زى ما انتى عايزة
الواضح انك تعبانة جدا والموضوع بتاعك معلم فيكى .. وليكى عذرك بالتأكيد بس خلى بالك انتى بالطريقة دى ولو استمريتى على كده مش هتعرفة تتوقفى ولا تهدى وبالتالى ابنك هيتأثر والنتيجة انك هتكون خسرانة حاجات كتيرة اولها نفسيتك واخرها واهمها نفسية ابنك
ربنا يجعلك متسامحة علشان تعرفى تعيشى وتطلعى ابنك زى ما انتى حابة
تقبلى تحياتى ودعائى