الأحد، 14 سبتمبر 2008

انوستى

من 18 سنة فى نفس التوقيت ده دخلت المستشفى علشان اولد انوستى الكبيرة
وطبعا لان البنات ولادتهم صعبة وتربيتهم اصعب قعدت اولد فيها لغاية الساعة 1 الضهر
وجت الانوسة والحمد لله ربنا يخليها ويبارك فيها وبقيت انا ماما .
عايزة اقولكم انى ما كنتش بنام خالص خالص وما كنتش ابدا اتخيل انى هعرف اكمل ولا ان الايام والسنين هيعدوا بالسرعة دى بالرغم من التعب وصغر سنى !
كتير ببص للاوانيس او بتأمل فيهم بصراحة ... فى شكلهم وطريقة كلامهم وحواراتهم وابتسم ابتسامة بلهاء .. أى والله بلهاء
وطبعا لما بتقفش متلبسة بالبلاهة بدخل فى استجواب ... بتضحكى ليه وعلى ايه وافتكرتى ايه ؟
وطبعا بتكون حالة البلاهة مستمرة وانا برد بكل براءة واقول :
بقى انتوا بتوعى ؟
يعنى انا خلفتكم وانتوا اللى كنتم صغيرين ومطلعين عين ام اللى جابونى ؟؟
وطبعا ما بينوبنيش الا التريقة .

قصره كل سنة واولادنا طيبين وربنا يرزق اللى ما عندوش ويبارك للى عنده
سلاموز

هناك 4 تعليقات:

عمو يقول...

أم البنات

كل سنة والأنوسة الكبيرة طيبة ، بما إن النهاردة عيد ميلادها ، وانتى كمان طيبة ، ويفرح قلبك بيهم وتشوفيهم أحسن الأوانيس فى الدنيا .

نظرة التأمل عمرها ما كانت بلاهه طبعا ، هو اللى بيتأمل زرعته وهيا بتكبر وتزهر شوية بشوية ، حتى لو سرح فى تعبه اللى فات يبقى " بتنتابه البلاهه "

هما يمكن مش فاهمين ، علشان كدة بيسألوا.
واجابتك علي سؤالهم أكيد
هتعلمهم " لو انتى انتهزتى الفرصة " حاجة جديدة ..
.................
واقول :
بقى انتوا بتوعى ؟
يعنى انا خلفتكم وانتوا اللى كنتم صغيرين

نفس الكلمة اللى بتقولها والدتك
ونفس الكلمة اللى هيقولوها بناتك لأولادهم.......

هيا دى الدنيا
زرع وحصاد ... وزرع جديد

.....................

لكن يا ترى حالة التأمل اللى انتى فيها دى سببها هدوء داخلى ؟
ولا دى تنهيدة .؟

قصره :)
كل سنة وانتوا طيبين جميعا انتى والأوانيس اللى كانوا صغيرين .....

تحياتى

dreem يقول...

عمو
ازيك ويارب تكون بأحسن حال وانت طيب يا عمو
صح كلامك كله كله
انا اجابة سؤالك بقى فااااااه يا عمو
وكل سنة وانت طيب
الا لا حرمت من سؤالك ومرورك الغالى

Mony يقول...

كل سنة و انتم الاتنين طيبين

معلش متأخرة


ربنا يقر عينك ببناتك و يرضيكي بيهم


و يخليكي ليهم

dreem يقول...

مونى
ولا يهمك حبيبتى كل يوم وانتى بخير يارب
ربنا يراضيكى ويسعدك
تحياتى