السبت، 18 يناير 2014

الحمد لله


\ ومن يأمن الدنيا يكن كقابض على الماء خانته فروج الاصابع صحيح كله مقدر ومكتوب واللهم لا اعتراض بس احيانا بتيجى شوية حاجات كتيييييرة اوى مع بعض فى وقت واحد بتخلى الواحد يفقد اتزانه ... مش ايمانه حاشا . وابتدت الحكاية باتفاق بسيط جدا على رحلة نقوم بيها كلنا ماما ايمان اختى وبنتها اسماء وامل اختى وولادها التلاتة نور وندى وياسين وجوزها وانا وبناتى ايمان واميرة رحلة يومين ونرجع تالت يوم نروح راس سدر تالت يوم العيد واللى كان موافق يوم خميس ونرجع يوم السبت كلنا كنا مبسوطين خصوصا البنات الكبار والصغيرين وطبعا طبعا احنا الساحرات الثلاثة ركبنا عربيتين انا وماما واتنين من ولاد امل مع جوزها والباقى كله ركب عربية امل ومشينا ورا بعض وقرب النفق لقيت جوز امل بيصرخ يا ساتر يا رب وراح وافف بالعربية ورجع لورا ... والمحصلة كانت : امل ماتت ايمان اختى كسر فالضلوع وفالصباع وشرخ فالرقبة وخياطة فالراس ايمان بنتى كسر فالحوض امامى وخلفى وعملية ومسمار ونوم فالسرير شهرين اسماء كسر فالحوض مستقر والحمد لله مفيش عمليات اميرة خياطة فالايد وجروح فالجنب الشمل وقزاز لسة بيطلع لغاية وقت قريب وكسر فى جزء من الركية وكدمات ندى بنت امل كسر فالجمجمة وغيبوبة والحمد لله فاقت امى ربنا يصبرها قلبها اتحرق على بنتها وما بتبطلش عياط والساحرات ما بقوش تلاتة وعروستى .. تحويشة عمرى اللى كانت هتتجوز شهر 11 هتدخل المستشفى تانى علشان تشيل المسمار والحمد لله من قبل ومن بعد

هناك 5 تعليقات:

موناليزا يقول...

أنا مش عارفة أقولك إيه
قرأت كذا مرة علشان استوعب.
لا نقول الا مايرضي ربنا
إنا لله وإنا اليه راجعون
لله ما أعطى ولله ما أخذ وكل شيء عنده بمقدار.
ربنا يثبتكم ويرزقكم الصبر ويغفر لفقيدكم ويشفي مرضاكم اللهم آمين

فاتيما يقول...

البقاء لله يا دريم
وألف سلامة على المصابين
ربنا قدر واللى حصل مكتوب
بس بتيجى أسباب عشان احنا نشوفه

مش عارفة أقولك ايه
بس انتوا ف محنة ومصاب
مينفعش معاه أى كلام ولا حاجة
ربنا يصبركم
وينزل صبر وسكينة على قلوبكم

بجد
مش عارفة أى أقول أى حاجة ...

فاتيما يقول...

انتى اختارتى أحسن كلام يتقال
ف عنوان التدوينة ..


الحمدلله
وربنا قادر يرد الصبر ع المصيبة دى
برحمته ..
ان شاء الله

ابراهيم رزق يقول...

قدر الله و ما قدر الله شاء

احيانا تعجز الكلمات
فعلا لا توجد كلمات تصبرك الا كلامه نعالى
[ وَبَشِّرِ الصَّابِرِينَ * الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلّهِ وَإِنَّا إِلَيْهِ رَاجِعونَ * أُولَئِكَ عَلَيْهِمْ صَلَوَاتٌ مِّن رَّبِّهِمْ وَرَحْمَةٌ وَأُولَئِكَ هُمُ الْمُهْتَدُونَ ] البقرة/154
صدق الله العظيم

dreem يقول...

موناليزا .. فاتيما ..ابراهيم رزق
شكرا ليكم