العمر بيجرى
لما بقعد معايا بلاقينى عديت بمصايب ومشاكل ما تتعددش وكنت وقتها شيفاها تهد جبل !
واهى خلصت وكل حاجة بتخلص وما بيبقاش بعدها الا شوية وجع
ومع الوقت اللى بيعدى بسرعة ومعاه العمر بيجرى
كله بيتنسى
الحمد لله
ان شاء بكرة هيبقى عمرى اربعين بالتمام والكمال
وكشف حسابى فيه التالى :
جوازة من 21 سنة نجحت بكل المقاييس برغم انتهائها , لان نتاجها ايمان واميرة
كملت تعليمى وبقيت مترجمة على الرغم انى ما بشتغلش ولا ناوية !
ما وجعتش حد ولا أذيت حد
علاقتى بربنا بقت اقوى , واتم الله فضله عليا بعمرتين ,, عقبال الحج بقى بعد خمس سنين لما اوصل للسن القانوني
عقلى اصبح اكثر نضجا ولكنى ما زلت عصبية وصريحة مع الاسف !
بفت نظرتى للناس اكثر واقعية الحمد لله اخيرا وما بحاولش اكبر دايرة معارفى واكتفيت بذلك القدر من الاوجاع
عملت مدونتى من ३ سنين ومنها اتعرفت على ناس محترمة وحلوة من جوة اوى وفيها فضيت اللى ينفع افضيه واللى ما ينفعش ربنا شاله
النتيجة انى راضية الحمد لله
مع انى كتير ببص لنص الكباية الفاضى وابقى تعبانة وزعلانة ,, بس بلاقى اللى يطبطب عليا و يفكرنى بالنص المليان
واللى فالوااقع كباية مليانة وفضل وكررم من المولى لا يكفيه الحمد والشكر ابد الدهر
الحمد لله ملء السماوات والارض وما بينهما
يبقى اقول
كل سنة وانا راضية بما قسمه الله لى
كل سنة وانا حمداه , شكراه على افضاله ونعمائه وجبره لى
ادعولى بدوام الرضا
هناك 11 تعليقًا:
ربنا يزيدك حمد وشكر ليه
وعقبال 110 سنة كلها فى طاعة الله
موناليزا
يارب
احلى دعوة وتهنئة ربنا يتقبلها منك يارب وربنا يجعل لك نصيبا من دعائك
تسلميلى يارب
باقة ورد ليكى
كل سنة وانتي من الحامدين الشاكرين الراضين بقضاء الله :)
جميل كشف الحساب
ممكن اعمل واحد زيه بس مش هلاقي حاجة من اللي انتي كتبتيها الا الحاجة اللي قلتي انك معملتيهاش .. فبالتالي اني اعمل و لله الحمد علي كل حال :)
ربنا يخليلك بناتك و تفرحي معاهم وبيهم ويريح بالك و يطمنك ويراضيكي ان شاء الله
خديني اقعد جنبك علشان انا كمان مستنية السن القانوني بس هقعد استناه اكتر منك شوية .. دا ان احياني الله و رضي عني و انعم عليا بيها
كله بأمر الله و ربنا يديم علينا فعل الحمد مش بس كلامه
اخبار الامتحانات ايه ؟ ربنا يوفق ان شاء الله :)
خدي بالك من نفسك باه و انبسطي اد ما تقدري :)
كل عام وحضرتك بالف خير وصحه وسعاده وزياده فى طاعه الله
ربنا يكرمك يارب بالحج باقرب مما تتصورى الامر بيد الله
وربنا يباركلك فى اولادك ويفرحك بيهم وهما ناجحين كده فى الدنيا وربنا راضى عنهم
يارب السنه اللى جايه والايام اللى جايه كلها تبقى احلى ايام عمرك وتفرحى فرحه كبيره يارب تسعد بيها ايامك
كل ثانية فى حياتك وانتى بخير دايما
ودايما الحمد لله
دمتِ بكل خير
جميل انك تحاولي تعرّفي بنفسك وفي نفس الوقت تتعرفي عليها من خلال كلمات زي اللي جت في موضوعك ده، بس الأجمل طبعا لما المحاولة دي تنجح زي ما حصل هنا، رغم انك ماذكرتيش سوى اسطر قليلة من كتاب اخدتك كتابته اربعين سنة حتى الآن... كل سنة وانت طيبة...
أليس العجيبة فى الزمن الاعجب
تخيلى انا بحس بيكى كده ,, جيتى فالزمن الغلط !
كل سنة وانتى طيبة وبخير يارب وان شاء الله مش هتقعدى جنبى ولا حاجة وربنا يديلك الصحة وتحجى وتعتمرى اكتر من مرة وتعملى كشف حساب برضه وانا اول واحدة تقراه وتدعيلك
الامتحانات يا اوختشى على ما تخلص هكون انا قعدت على كرسى متحرك .. خصوصا ان اميرة من النوع المتوتر على طول وما ادراكى ما توتر اميرة
بس برضه الحمد لله رضا ربنا يكملها على خير .
وحاااااااااضر هتبسط على قد ما اقدر
ههههههههههههههه
تحيتى
--------------------
جيجى ورلد
وانتى طيبة وربنا يخيكى ويسعدك زى ما اسعدتينى بالزيارة الاول والتعليق اللى كله دعوات تشرح الصدر وربنا يجعل لك حظا من دعائك
كل التحية
-------------------
ميس فينوس
وانتى طيبة يارب وبخير وبعيدة كل البعد عن الحزن
والحمد لله دائما ابدا
تحيتى
----------------------------
هنا وهناك
كيف حالك هنا وهناك ؟
انا موش فهمت ! ممكن توضح - عروستى
وكل سنة وانت طيب
تقبل تحيتى
خلصتوا امتحانات :) ؟
ان شاء الله تكون عدت بسلام وربنا يفرحكم بالتوفيق ان شاء الله
اليس الجميلة
خلصنا وخلصت معاها وربنا كريم
ربنا ما يحرمتى من سؤالك يا حبيبتى
كل التحية
ربنا يباركلك فيهن .. ان شاء الله بالتوفيق و النجاح .. ان الله لا يضيع اجر من احسن عملا و ان شاء الله ربنا يكرمك فيهن :)
ربنا يديم علينا وعليكى نعمة الرضا ويارب يخليلك اولادك وتشوفهم فى احسن حال
تمنياتى بالسعادة
إرسال تعليق