الخميس، 18 سبتمبر 2008

على الرغم ان مفيش اى حاجة مضايقانى الا انى حاسة ان النور قاطع مش عارفة ليه !!

مش عايزة اتعامل مع حد ولا اكلم حد ولا اشوف حد ولا حتى اخرج من البيت

شيلت الستارة وبصيت وراها ما لقيتش حاجة

بصيت فى مرايتى وبرضه ما لقيتش حاجة اللهم الا شوية زهق وترسبات قديمة بينى وبين بعض المقربين ممزوجة بشويتين قرف وحبة زهق واتحط عليهم شوية احساس بوجوب الاقتصار وعدم التعامل

طب فين المشكلة يا دودو ؟؟

المشكلة ان المقربين دول ما ينفعش اعمل معاهم كده خصوصا لما يكونوا من الاهل ومش اى مقربين والسلام !

طب والحل يا دودو ؟؟

مش عارفة !!!

ومش عايزة كمان

حاسة انى كباية مليانة ومش قادرة افضينى

شايلة كتير وكمان ما عنديش استعداد اسامح

زهقت من انى ابقى الطيبة على طول الخط

حاجة اوف كده

هناك 9 تعليقات:

هانى زينهم يقول...

كلنا هذا الانسان . يعنى ما تحمليش الامور فوق طاقتها من وقت للتانى كلنا بنمر بده بس كل واحد بيتعامل بطريقته مع الحكاية دى اقتصرى شوية لغاية ما الشحنة الموجودة تفضى وبعدين واحدة واحدة هترجعى للناس تانى . تحياتى

dreem يقول...

هانى زينهم
اغلب الظن ان كلامك صحيح وجارى العمل بالنصيحة اشكرك
تحياتى

KHALED يقول...

العزيزة دريم
مراحل الإكتئاب عديدة و أعتقد إن دى من مراحلة المتأخرة لازم تلاقى متنفس من الحالة دى ويكون مع حد غير كل إللى تعرفية .........
ملحوظة
إدخلى على السيتينج و عدلى الزمن فى المدونة علشان التاريخ عندك موش مظبوط

dreem يقول...

خالد
حاضر يا خالد هبقى اشوف الموضوع ده .. وظبط التاريخ يا فندم

Mony يقول...

حاسة انك بتتكلمي بلساني يا دريم



بس انصحك بالستغفار


قال تعالى: "فقلت استغفروا ربكم إنه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم أنهارا"

قال رسول الله صلى الله عليه وسلم "من لزم الاستغفار جعل الله له من كل هم فرجا ومن كل ضيق مخرجا ورزقه من حيث لا يحتسب"


طول مانت قاعده خللي الاستغفار شغال علي طول

غير معرف يقول...

السلام عليكم ...انا يدوب رديت على تعليق حضرتك عندى وجيت اشوف مدونتك علطول بس الموضوع خد منى وقت طويل لانى قريتها كلها كلها ..
وطبعا عجبنى اوى البوستات اليى عن الجواز والطلاق والزوجه التانيه وغيره وغيره والبوستات اليى بتتكلمى فيها عن بناتك ربنا يباركلك فيهم عجبنى اسلوب قربك ليهم وحوارك معاهم ربنا يحفظهم ويجعلهم سبب لدخولك الجنه..
ويا رب الانوسه الكبيره تتوفق فى الكورسات وترجع تروح الجيم تانى
اما كلام حضرتك عن والدك فكأنك بتتكلمى بالضبط عن والدى الله يرحمه
وكلام حضرتك برضه عن مامتك زمان وانكوا كنتوا مختلفين فى الراى او مش قريبين زى قربك لباباكى برضه زى حالاتى بالضبط...
وموضوع انك بتتكلمى عن نفسىك او بتفضفضى بفضيحه برضه نفس الحال لا والصداع المستمر لو لقيتى حضرتك ليه علاج عن الجزمه قوليلى..
والف الف لا باس على ايد حضرتك ربنا يجعلها اخر مره ان شاء الله...
اما عرى شرم الشيخ فقولى دول اجانب انا فى مارينا البنات بتشترى من السوبرماركت وهيا لابسه البكينى اه والله شفتهم بعينى حتى مش لافه حاجه على وسطها والمهم انهم مصريات ومسلمات كمان بس لو سالت واحده منهم ان كده ميصحش قالتلى انا بلبسه على البحر قدام الناس كلها ايه المانع انى انزل اشترى بيه حاجه اتمنيت ساعتها ان ربنا ليهديها ليهديها فموضوع العرى ده اعتقد انه فى الصيف فى مصر بيبقا شئ عادى عادى
وربنا يلطف بينا...

غير معرف يقول...

انا فعلا اتبسطت انى اتعرفت على مدونة حضرتك جدا جدا وربنا يباركلك فى بناتك ونورتينى حضرتك بالزياره
وبشكرك جدا عليها...
وعيد سعيد ومبارك على حضرتك والانانيس وكل من تحبين...ودايما حياتك فى اعياد ان شاء الله..

غير معرف يقول...

ممكن تكوني محتاجة تخرجي عن المألوف والروتين اليومي... في حياة كل منا الحلو والوحش... واضح من كلماتك إنك بتشوفي الوحش أكتر بكتير من الحلو... بس أكيد في حياتك وحولك حاجات حلوة كتير... إبحثي عن الحاجات دي و حاولي تتناسي الوحش...

dreem يقول...

مونى
زعلتينى يا مون انتى لسة صغنونة يا لوزة علشان توصلى لهذه المرحلة وحااااااضر يا فندم هلزم الاستغفار وربنا يكرمك
على فكرة انتى وحشتينى بجد

*************************

عايزة اتطلق
طبعا ومن غير كلام انتى نورتى واكيد هيكون بينا كلام كتير الفترة اللى جاية
بس عايزاكى تجمدى وكله بيعدى صدقينى
ان شاء الله كل ايامك وسنينك اللى جاية هتكون احلى وكل سنة وانتى طيبة وعيدك مبارك ( مش مبارك الريس هه)

***************************

هنا وهناك
ازيك وفينك ؟؟
شوف بالنسبة لجزئية انى محتاجة اخرج عن الروتين فكلامك صحيح .. اما فى حكاية انى بشوف الوحش اكتر بكتير فدى اكيد غلط لانى والحمد لله من قبل ومن بعد مدركة جدا للنعم الكتيرة والحاجات الحلوة اللى ربنا اديهالى بس يمكن القدرة على الاحتمال قلت بمرور الزمن
هيييييييييه ياللا حسن الختام
شرفتنى وكل سنة وانت طيب هنا وهناك