امسكوا الخشب يا حبايب

وتعالوا نقول :
زى ما قرفتكم بالشكوى من البنات والاكتئاب تعالوا افرحوا معايا
الانسة اميرة ابنتى المصون نجحت فالثانوية العامة بمجموع 97 % وابدا دماغها صرمة قديمة ما تدخلش لا اسنان ولا صيدلة
هى اقتصاد وعلوم سياسية انجليزى طب يا حبيبتى دخلتى علمى علوم ليه ما انتى لو كنتى دخلتى ادبى كنتى طلعتى الاولى عالجمهوريةولا الهوا هى كلمة واحدة ما ادخلهاش يا ماما ما ادخلهاش
اقول ايه كل واحد دماغه مريحاه وتاعبة امه .. ياللا بقى باركولى
كل سنة وانتم جميعا طيبين بمناسبة قدوم شهر رمضان وربنا يعيده علينا وعلى الامة الاسلامية بالخير يارب

خلصت امتحانات اميرة وخلصت انا نفسيا منها ومعاها وفاضل ايمان تخلص واخد بعضى او ما بقى منها واروح اى مكان اقعد مع نفسى ,, لوحدى من غير اى مسئويات ولا توتر ولا بوز ولا طلبات
اوووووف
انا مش مبسوطة يارب وانت عارف

محتاجة شوية وحدة
محتاجة افضى دماغى من كل حاجة
كبايتى اتملت عن اخرها
عندى حالة ملل

سلامو عليكو

اميرة بتمتحن وما ادراكم ما الامتحانات عند اميرة .. توتر وعياط وقلق وعدم نوم وبرم فالشقة رايح جاى وشكوى من الام مبرحة من ضهرها ورجليها ورقبتها وطبعا طبعا ما بتسمعش الكلام لما اقولها اقعدى وانتى بتذاكرى لانها مؤمنة ايمان راسخ انها بالبرم بتنجز اكتر واهو ربنا يعدى الامتحانات على خير
ايمان لسة هتبتدى بعد بكرة امتحاناتها وربنا يوفقها وينولها اللى هى عايزاه ,, سمعونى ااااميييييين
النهاردة عيد ميلادى ال41 صحيت مالنوم على رنة جرس الباب ولقيت احلى مفاجأة ... نورا ودودو وشاهى وبناتها وتورتاية وهابى بيرث دايو تو يو وهدايا وفوقهم حب بيبان من نظرة العين ويتحس حتى بالحضن
حلو اوى انى افتح عينى على ناس انا بعشقهم وبحس معاهم ان ربنا بيحبنى اوى لانه رزقنى بقد كده ناس جميلة من جوة ومن برة
حلو حب الناس اوى بيغير طعم الايام
انا مبسوطة الحمد لله وراضية
ماما واخواتى واصحابى وبناتى واصدقائى .. أنا بحمد ربنا عليكم لانكم فعلا فضل ومنة من عنده
وكل سنة وانا راضية يارب
الحمد لله الذى لا يحمد الا الاه
فوتكم بعافية

دوام الحال من المحال

نعيش قصة حب جميلة نحس فيها اننا مالكين الدنيا ولامسين النجوم بأدينا ومافيش احلى من كده ولا عايزين حاجة تانى ابدا طالما مع اللى بنحبه واللى لو بعدنا ممكن نموت !
وتعدى الايام وينتهى الحب ويتكسر القلب ونحس بالقهر واننا مش قادرين نعيش او عايشين زى الميتين ومش متخيلين بكرة هييجى علينا ازاى وكل احلامنا ضاعت مع اللى كنا بنحبه!
وتعدى الايام تانى
نفتكر اللى كنا بنحس بيه لما كنا بنحب ونضحك
ونفتكر القهرة اللى حسينا بيها لما ضاع الحب وبرضه نضحك
مفيش حاجة بتفضل على حالها ولا فيه حد ما ينفعش يتنسى وكله بيعدى
سبحان الذى يغير ولا يتغير

يارب

أفنيت عمري في ارتقاب المنى
ولم أذق في العيش طعم الهنا
وإنني أشفق أن ينقضي عمري وما فارقت هذا العنا

فضفضة

انا محتاجة اتغير

اه عجبانى زى ما انا بعيوبى اكتر من مميزاتى بس موجوعة اوى وبقت حاسة انى غلط ومش هقدر اتحمل !

مش معنى انى بتعامل وبتكلم بصراحة ومفيش فحياتى ما اخفيه او اخشاه انى اكون ملطشة وكل حد يدلى بدلوه فىما يخص حياتى وقراراتى

عندى شوية عقد وكلاكيع بس بجيد التعامل معاها الا اذا حصل اللى يخليهم يقبوا عالسطح , وده اللى حاصل دلوقتى

شريط سخيف اتكرررررر جوة دماغى مخلينى مصدعة ومقريفة وزهقانة ومش عارفة اتعامل مع حد قريب منى جدا ,,,, فقدت ثقتى فيه وكارهاه وعايزة اقوله كلام كتير يوجع بس مش قادرة لانه ما ينفعش !

فيه حد بحبه اوى وعايزة اكون معاه طول الوقت بس احيانا بحس انه كتير انانى ومش باصص الا فى مرايته وبس , ولما بحطنى مكانه بلاقيه عنده حق ومعزور !

بحس احيانا ان بناتى يتمتعوا بكم هائل من الانانية وانهم اشترونى من سوق النخاسة وبقيت ملك خالص ليهم وليهم بس ,, اه ساعات بعزو ده لحبهم الشديد ليا بس برجع واقول ان حتى الحب لازم يكون فيه مساحة من الحرية .

ليه البنى ادم ما بيعرفش قيمة الحاجة الا لما تضيع منه ؟

ليه لازم اوجع علشان افهم حد بأنه وجعنى ؟

ليه الدنيا ماتكونش سلسة ومش مكلكعة واللى عايز يعمل حاجة يعملها طالما حقه ومش عيب ولا حرام ؟

ليه لازم نعافر ونشغل دماغنا ونتلون ونتلوى علشان نوصل للى عايزينه ؟

لبست وش التمرد وابتدا يلبسنى , وعاجبنى بس خايفة منه وانا ما بحبش الخوف .

انا منهكة نفسيا

انا حرة

ماحدش ليه دعوة بيا وانا حرة وتصرفاتى واختياراتى من حقى انا وبس
اخترت صح وبقيت مبسوطة انا اللى هتبسط
اخترت غلط وبقيت متضايقة انا اللى هتضايق
وقعت واتكسرت رقبتى انا اللى هتوجع
كل واحد يخليه فحاله , وكل واحد يظبط حياته بالطريقة اللى حاببها
حياتى مش استفتاء وكل واحد يقول رأيه , وحتى لو كانت .. القرار ليا انا لوحدى وتبعاته انا اللى هتحملها لوحدى برضه
بقيت سعيدة ماحدش هياخد من سعادتى
بقيت حزينة برضه ماحدش هيشيل عنى حزنى
ايه القرف ده !