الدنيا متلخبطة حواليا عندى خيارات كتيرة ممكن تتغير معاها وبيها حاجات كتيرة اوى بس انا مش عايزة اعملها , صحيح لسة بعرف اعافر بس ماليش مزاج .. انا لا منكسرة ولا مستسلمة !! شايفة الصورة بوضوح غريب و بكل عيوبها ونواقصها والغريب انى مش متضايقة ... زى اللى قاعد فى بلكونة وبيتفرج عاللى بيحصل مش عارفة بقى دا نضوج ولا هبل فوتكم بعافيه

ما بقيتش فاهمة

مليانة كلام مش عارفة اطلعه
حاسة انى محشية ومدفوسة وجوايا حاجات كتيرة اوى مش عارفة افصلها عن بعضها
مش متضايقة ومش مبسوطة
راضية ومش ناقمة
ولا تعبانة ولا مرتاحة
مش حاسة حتى بالملل

بنت روحى

الحمد لله الذى بنعمته تتم الصالحات

دعواتكم

امل اختى هتعمل عملية النهاردة ادعولها

سلامو عليكو

اول يوم النهاردة لاميرة فالجامعة .. كانت متوترة ومش عارفة تنام امبارح وعمالة تسألنى تفتكرى انا هعرف امشى فالكلية دى وهفهم ؟ ارد عليها واقول : انتى ذكية وتعرفى وتقدرى تمشى فى اى حاجة واكيد كل حاجة جديدة بتبقى صعبة بس ان شاء الله هتقدرى وخليكى دايما حسنة الظن بربنا
طيب هو ممكن حد يضايقنى فالجامعة ؟
اقولها : كل شىء وارد المهم ما تخافيش وخليكى واثقة فى نفسك
وراحت الجامعة واتصلت اطمنت عليها واهى ماشية الحمد لله ربنا يوفقها ويحفظها هى وكل ولادنا .
ايمان بقى الباحثة عن كل جديد بتاخد كورسات فى اى حاجة وكل حاجة وبتبحث باصرار عن شغل مع انها عارفة انها من المفترض ان شاء الله تشتغل فى البنك بس هقول ايه دمااااغ .
المهم يعنى القاعدة فالبيت لوخدى من غير البنات بايخة ودمها تقيل عاملة زى اللى متجوزة وقاعدة مستنية جوزها يرجع من الشغل واللى مالهوش مواعيد هههه بيوحوشونى ولاد ال...
ولا بلاش الطيب احسن
فوتكم بعافية

هنو ابو الفصاد

النهاردة ايمان بقى عمرها21
كل سنة وانتى طيبة يا بنتى البكرية
كل سنة وانتى طيبة يا صاحبتى واختى وامى الصغيورة
ربنا يبارك فيكى ويبلغك املك ويحقق لك كل اللى تحلمى بيه فى ظل طاعته

ان بعد العسر يسرا

اوى اتبسطت لما حسيت ان اميرة بتغير عليا
وكتير هديت لما علاقتى بايمان رجعت زى الاول
وبرضه ناهد شريكة حياتى
ربنا رزقنى بشوية اصحاب ولا اجمل
الدنيا ابتدت تتظبط الحمد لله
انا راضية
ربنا يكملها على خير
قولوا امين

فضفضة امرأة مجروحة

قالتلى : انتهى بالنسبة لى ومات ,, اللى كنت ارضى اديله عيونى واشووف بعيونه
اللى حبيته بأيامى وسنينى
مات واتقفل قلبى من ناحيته وما بقيتش اقدر اتنفس فى وجوده
بدعى ربنا ان يوارب قلبى بس يواربه علشان اقدر اكمل واربى العيال !
يااااااااااااه العيال
العيال
هيفضلوا واجعينا ومتحكمين فى حياتنا وخنقينا وربطينا وفى الاخر بيسيبونا مرميين فى بيوتنا وكل واحد فيهم بيدور على حياته .. وتكون حياتنا احنا كبنى ادمين خلصت وضاعت وفقدنا فالسكة حاجات كتير ومشاعر كتير وتغاضينا على رغبات مشروعة بس علشان احنا بنى ادمين بنعمل المفروض والواجب
وبرضه هقول ان المفروض والاولى اننا كبنى ادمين نعيش واحنا عندنا الحد الادنى من الراحة والرضا .. الرضى الفعلى عن اللى بيدور فى حياتنا , مش بس بنعمل المفروض علينا ,, مش بس ندور على راحة اللى حوالينا ,, مش بس ناخد بالنا من كلام الناس
او نخاف من اللوم حتى لو كان من عيالنا واللى مهما عملنالهم وعملنا معاهم بيتشاف على انه حق وواجب علينا
مش حلو ابدا ان البنى ادمين ياخدوا وما يدووش
مش حلو ابدا اننا نفضل نلف فى دايرة اسمها المفروض والواجب
! مش حلو ابدا ان البنى ادم بغباوته وظلمه وقسوته يحول حبنا ليه لكره وبغض
ودمتم