ازيكم شكلي كده هرجع افضفض تاني بس بشكل مختلف ماهو فيه حاجات كتييير اوي اتغيرت

ويبدو ان اوجاع العمر لن تنتهى ,, فما ان ينتهى وجع حتى يبدأ اخر وكأننى اصبحت اسيرة الاوجاع !!

انكسر جواانا شىء

الحمد لله رب العالمين

تمزق حاد فى عضلة الكتف والم لا يحتمل ... الحمدوالشكر ليك يارب

يارب

ايمان هتعمل عملية بكرة دعواتكم

الحمد لله

\ ومن يأمن الدنيا يكن كقابض على الماء خانته فروج الاصابع صحيح كله مقدر ومكتوب واللهم لا اعتراض بس احيانا بتيجى شوية حاجات كتيييييرة اوى مع بعض فى وقت واحد بتخلى الواحد يفقد اتزانه ... مش ايمانه حاشا . وابتدت الحكاية باتفاق بسيط جدا على رحلة نقوم بيها كلنا ماما ايمان اختى وبنتها اسماء وامل اختى وولادها التلاتة نور وندى وياسين وجوزها وانا وبناتى ايمان واميرة رحلة يومين ونرجع تالت يوم نروح راس سدر تالت يوم العيد واللى كان موافق يوم خميس ونرجع يوم السبت كلنا كنا مبسوطين خصوصا البنات الكبار والصغيرين وطبعا طبعا احنا الساحرات الثلاثة ركبنا عربيتين انا وماما واتنين من ولاد امل مع جوزها والباقى كله ركب عربية امل ومشينا ورا بعض وقرب النفق لقيت جوز امل بيصرخ يا ساتر يا رب وراح وافف بالعربية ورجع لورا ... والمحصلة كانت : امل ماتت ايمان اختى كسر فالضلوع وفالصباع وشرخ فالرقبة وخياطة فالراس ايمان بنتى كسر فالحوض امامى وخلفى وعملية ومسمار ونوم فالسرير شهرين اسماء كسر فالحوض مستقر والحمد لله مفيش عمليات اميرة خياطة فالايد وجروح فالجنب الشمل وقزاز لسة بيطلع لغاية وقت قريب وكسر فى جزء من الركية وكدمات ندى بنت امل كسر فالجمجمة وغيبوبة والحمد لله فاقت امى ربنا يصبرها قلبها اتحرق على بنتها وما بتبطلش عياط والساحرات ما بقوش تلاتة وعروستى .. تحويشة عمرى اللى كانت هتتجوز شهر 11 هتدخل المستشفى تانى علشان تشيل المسمار والحمد لله من قبل ومن بعد

بنت عمرى

تفضية

راضية الحمد لله بس . .. ما بحبش اقول بس ولكن فيه حاجة عندى من جوة جوة قلبى موجوعة كأن حد ضربنى فيه بسكينة وما فيش نزيف بس كل نفس باخده السكينة بتوجعنى ! لما بفكر وبدور بلاقى انى راضية بكل حاجة حصلت وبتحصل معايا .. صحيح فيه حاجات كتير ما بتعجبنيش ومش بتكون زى ما اتمنيت بس المحصلة انى راضية وموجوعة مقتنعة ان ربنا دايما دايما بيختار لينا الخير حتى لو احنا شايفين العكس ومع ذلك برضه بنزعل وبنتوجع !! احنا تركيبتنا غريبة اوى دايما بندور على الناقص مع ان الموجود اكتر بكتير بنتعلق باللى ما بيقدرش ولا بيستاهل بنتعامل بادمية مع مخلوقات ما بتحسش كتير بندور على اسعاد اللى حوالينا فى حين انهم بيدوروا على اللى يقرفنا ومش فاهمة ليه بنفضل ندى وندى وندى وما بناخدش واللى بياخد بيفضل ياخد ياخد ياخد ياخد وما بيحسش غير انه ده حقه وواجب ومفروض علينا وحتى مش من حقنا نقول احنا تعبنا مالعطاء وعايزين ناخد بقى انانية وقسوة وطمع وحب امتلاك واهمال وبخل وظلم وسنين بتعدى وحاجات بتضيع وحاجات بتموت ونفضل احنا ندور على روحنا ونزق الايام علشان تعدى ونتنازل شوية ونطنش شويتين ويوم يجر يوم واحنا بنعافر وبندور على السعادة والاحساس بالامان وتبقى المحصلة ان كل واحد عايز ياخد منك حتة والمفروض انك تبقى عاااادى وراضى ومبسوط وما تنطقش ولا تعترض وده برضه ما بيقولش اننا مش راضيين لان الرضا ما بيمنعش الوجع