فضفضة عالسريع

بنت روحى

2011-12-23T10:09:00.000+02:00

الحمد لله الذى بنعمته تتم الصالحات

دعواتكم

2011-10-27T02:37:00.002+02:00

امل اختى هتعمل عملية النهاردة ادعولها

سلامو عليكو

2011-10-03T00:08:00.000+02:00

اول يوم النهاردة لاميرة فالجامعة .. كانت متوترة ومش عارفة تنام امبارح وعمالة تسألنى تفتكرى انا هعرف امشى فالكلية دى وهفهم ؟ ارد عليها واقول : انتى ذكية وتعرفى وتقدرى تمشى فى اى حاجة واكيد كل حاجة جديدة بتبقى صعبة بس ان شاء الله هتقدرى وخليكى دايما حسنة الظن بربنا
طيب هو ممكن حد يضايقنى فالجامعة ؟
اقولها : كل شىء وارد المهم ما تخافيش وخليكى واثقة فى نفسك
وراحت الجامعة واتصلت اطمنت عليها واهى ماشية الحمد لله ربنا يوفقها ويحفظها هى وكل ولادنا .
ايمان بقى الباحثة عن كل جديد بتاخد كورسات فى اى حاجة وكل حاجة وبتبحث باصرار عن شغل مع انها عارفة انها من المفترض ان شاء الله تشتغل فى البنك بس هقول ايه دمااااغ .
المهم يعنى القاعدة فالبيت لوخدى من غير البنات بايخة ودمها تقيل عاملة زى اللى متجوزة وقاعدة مستنية جوزها يرجع من الشغل واللى مالهوش مواعيد هههه بيوحوشونى ولاد ال...
ولا بلاش الطيب احسن
فوتكم بعافية

هنو ابو الفصاد

2011-09-14T22:33:00.000+02:00

النهاردة ايمان بقى عمرها21
كل سنة وانتى طيبة يا بنتى البكرية
كل سنة وانتى طيبة يا صاحبتى واختى وامى الصغيورة
ربنا يبارك فيكى ويبلغك املك ويحقق لك كل اللى تحلمى بيه فى ظل طاعته

ان بعد العسر يسرا

2011-09-06T23:45:00.000+02:00

اوى اتبسطت لما حسيت ان اميرة بتغير عليا
وكتير هديت لما علاقتى بايمان رجعت زى الاول
وبرضه ناهد شريكة حياتى
ربنا رزقنى بشوية اصحاب ولا اجمل
الدنيا ابتدت تتظبط الحمد لله
انا راضية
ربنا يكملها على خير
قولوا امين

فضفضة امرأة مجروحة

2011-09-01T19:00:00.000+02:00

قالتلى : انتهى بالنسبة لى ومات ,, اللى كنت ارضى اديله عيونى واشووف بعيونه
اللى حبيته بأيامى وسنينى
مات واتقفل قلبى من ناحيته وما بقيتش اقدر اتنفس فى وجوده
بدعى ربنا ان يوارب قلبى بس يواربه علشان اقدر اكمل واربى العيال !
يااااااااااااه العيال
العيال
هيفضلوا واجعينا ومتحكمين فى حياتنا وخنقينا وربطينا وفى الاخر بيسيبونا مرميين فى بيوتنا وكل واحد فيهم بيدور على حياته .. وتكون حياتنا احنا كبنى ادمين خلصت وضاعت وفقدنا فالسكة حاجات كتير ومشاعر كتير وتغاضينا على رغبات مشروعة بس علشان احنا بنى ادمين بنعمل المفروض والواجب
وبرضه هقول ان المفروض والاولى اننا كبنى ادمين نعيش واحنا عندنا الحد الادنى من الراحة والرضا .. الرضى الفعلى عن اللى بيدور فى حياتنا , مش بس بنعمل المفروض علينا ,, مش بس ندور على راحة اللى حوالينا ,, مش بس ناخد بالنا من كلام الناس
او نخاف من اللوم حتى لو كان من عيالنا واللى مهما عملنالهم وعملنا معاهم بيتشاف على انه حق وواجب علينا
مش حلو ابدا ان البنى ادمين ياخدوا وما يدووش
مش حلو ابدا اننا نفضل نلف فى دايرة اسمها المفروض والواجب
! مش حلو ابدا ان البنى ادم بغباوته وظلمه وقسوته يحول حبنا ليه لكره وبغض
ودمتم

مع نفسى

2011-08-26T20:24:00.000+02:00

اقرأ كتابا ,, رواية
تتوه منى المعانى ,, تختلط الاحرف و يتوارى عقلى
فأكتفى !

2011-08-19T23:18:00.000+02:00

اتضايق .. اتبسط اجرى ادور عليها واكلمها
شريكة حياتى
معاها تاريخى
سنين حزنى وساعات فرحى
مرايتى وكاتمة اسرارى وحافظة مشاعرى
مفيش حاجة اتكسف اقولهالها
اقرب لى من اخواتى
ناهد
رفيقة حياتى
ادامك الله لى وحفظك من كل سوء

وامسكو الخشب تانى

2011-08-19T15:02:00.000+02:00

وباركولى تانى
الانسة ايمان حصلت على بكالوريوس تجارة انجليزى بتقدير عام جيد جدا والحمد لله الذى بنعمته تتم الصالحات .
انا مبسوطة اوى الحمد لله

امسكوا الخشب يا حبايب

2011-07-30T02:01:00.000+02:00

وتعالوا نقول :
زى ما قرفتكم بالشكوى من البنات والاكتئاب تعالوا افرحوا معايا
الانسة اميرة ابنتى المصون نجحت فالثانوية العامة بمجموع 97 % وابدا دماغها صرمة قديمة ما تدخلش لا اسنان ولا صيدلة
هى اقتصاد وعلوم سياسية انجليزى طب يا حبيبتى دخلتى علمى علوم ليه ما انتى لو كنتى دخلتى ادبى كنتى طلعتى الاولى عالجمهوريةولا الهوا هى كلمة واحدة ما ادخلهاش يا ماما ما ادخلهاش
اقول ايه كل واحد دماغه مريحاه وتاعبة امه .. ياللا بقى باركولى
كل سنة وانتم جميعا طيبين بمناسبة قدوم شهر رمضان وربنا يعيده علينا وعلى الامة الاسلامية بالخير يارب

2011-07-05T01:42:00.000+02:00

خلصت امتحانات اميرة وخلصت انا نفسيا منها ومعاها وفاضل ايمان تخلص واخد بعضى او ما بقى منها واروح اى مكان اقعد مع نفسى ,, لوحدى من غير اى مسئويات ولا توتر ولا بوز ولا طلبات
اوووووف
انا مش مبسوطة يارب وانت عارف

2011-07-01T02:46:00.000+02:00

محتاجة شوية وحدة
محتاجة افضى دماغى من كل حاجة
كبايتى اتملت عن اخرها
عندى حالة ملل

سلامو عليكو

2011-06-13T14:45:00.001+02:00

اميرة بتمتحن وما ادراكم ما الامتحانات عند اميرة .. توتر وعياط وقلق وعدم نوم وبرم فالشقة رايح جاى وشكوى من الام مبرحة من ضهرها ورجليها ورقبتها وطبعا طبعا ما بتسمعش الكلام لما اقولها اقعدى وانتى بتذاكرى لانها مؤمنة ايمان راسخ انها بالبرم بتنجز اكتر واهو ربنا يعدى الامتحانات على خير
ايمان لسة هتبتدى بعد بكرة امتحاناتها وربنا يوفقها وينولها اللى هى عايزاه ,, سمعونى ااااميييييين
النهاردة عيد ميلادى ال41 صحيت مالنوم على رنة جرس الباب ولقيت احلى مفاجأة ... نورا ودودو وشاهى وبناتها وتورتاية وهابى بيرث دايو تو يو وهدايا وفوقهم حب بيبان من نظرة العين ويتحس حتى بالحضن
حلو اوى انى افتح عينى على ناس انا بعشقهم وبحس معاهم ان ربنا بيحبنى اوى لانه رزقنى بقد كده ناس جميلة من جوة ومن برة
حلو حب الناس اوى بيغير طعم الايام
انا مبسوطة الحمد لله وراضية
ماما واخواتى واصحابى وبناتى واصدقائى .. أنا بحمد ربنا عليكم لانكم فعلا فضل ومنة من عنده
وكل سنة وانا راضية يارب
الحمد لله الذى لا يحمد الا الاه
فوتكم بعافية

دوام الحال من المحال

2011-05-21T14:27:00.000+02:00

نعيش قصة حب جميلة نحس فيها اننا مالكين الدنيا ولامسين النجوم بأدينا ومافيش احلى من كده ولا عايزين حاجة تانى ابدا طالما مع اللى بنحبه واللى لو بعدنا ممكن نموت !
وتعدى الايام وينتهى الحب ويتكسر القلب ونحس بالقهر واننا مش قادرين نعيش او عايشين زى الميتين ومش متخيلين بكرة هييجى علينا ازاى وكل احلامنا ضاعت مع اللى كنا بنحبه!
وتعدى الايام تانى
نفتكر اللى كنا بنحس بيه لما كنا بنحب ونضحك
ونفتكر القهرة اللى حسينا بيها لما ضاع الحب وبرضه نضحك
مفيش حاجة بتفضل على حالها ولا فيه حد ما ينفعش يتنسى وكله بيعدى
سبحان الذى يغير ولا يتغير

يارب

2011-04-29T20:47:00.001+02:00

أفنيت عمري في ارتقاب المنى
ولم أذق في العيش طعم الهنا
وإنني أشفق أن ينقضي عمري وما فارقت هذا العنا

فضفضة

2011-04-25T02:37:00.003+02:00

انا محتاجة اتغير

اه عجبانى زى ما انا بعيوبى اكتر من مميزاتى بس موجوعة اوى وبقت حاسة انى غلط ومش هقدر اتحمل !

مش معنى انى بتعامل وبتكلم بصراحة ومفيش فحياتى ما اخفيه او اخشاه انى اكون ملطشة وكل حد يدلى بدلوه فىما يخص حياتى وقراراتى

عندى شوية عقد وكلاكيع بس بجيد التعامل معاها الا اذا حصل اللى يخليهم يقبوا عالسطح , وده اللى حاصل دلوقتى

شريط سخيف اتكرررررر جوة دماغى مخلينى مصدعة ومقريفة وزهقانة ومش عارفة اتعامل مع حد قريب منى جدا ,,,, فقدت ثقتى فيه وكارهاه وعايزة اقوله كلام كتير يوجع بس مش قادرة لانه ما ينفعش !

فيه حد بحبه اوى وعايزة اكون معاه طول الوقت بس احيانا بحس انه كتير انانى ومش باصص الا فى مرايته وبس , ولما بحطنى مكانه بلاقيه عنده حق ومعزور !

بحس احيانا ان بناتى يتمتعوا بكم هائل من الانانية وانهم اشترونى من سوق النخاسة وبقيت ملك خالص ليهم وليهم بس ,, اه ساعات بعزو ده لحبهم الشديد ليا بس برجع واقول ان حتى الحب لازم يكون فيه مساحة من الحرية .

ليه البنى ادم ما بيعرفش قيمة الحاجة الا لما تضيع منه ؟

ليه لازم اوجع علشان افهم حد بأنه وجعنى ؟

ليه الدنيا ماتكونش سلسة ومش مكلكعة واللى عايز يعمل حاجة يعملها طالما حقه ومش عيب ولا حرام ؟

ليه لازم نعافر ونشغل دماغنا ونتلون ونتلوى علشان نوصل للى عايزينه ؟

لبست وش التمرد وابتدا يلبسنى , وعاجبنى بس خايفة منه وانا ما بحبش الخوف .

انا منهكة نفسيا

انا حرة

2011-04-19T20:44:00.003+02:00

ماحدش ليه دعوة بيا وانا حرة وتصرفاتى واختياراتى من حقى انا وبس
اخترت صح وبقيت مبسوطة انا اللى هتبسط
اخترت غلط وبقيت متضايقة انا اللى هتضايق
وقعت واتكسرت رقبتى انا اللى هتوجع
كل واحد يخليه فحاله , وكل واحد يظبط حياته بالطريقة اللى حاببها
حياتى مش استفتاء وكل واحد يقول رأيه , وحتى لو كانت .. القرار ليا انا لوحدى وتبعاته انا اللى هتحملها لوحدى برضه
بقيت سعيدة ماحدش هياخد من سعادتى
بقيت حزينة برضه ماحدش هيشيل عنى حزنى
ايه القرف ده !

فضفضة

2011-04-15T04:49:00.003+02:00

اجمل حاجة امى وابويا عملوها فحياتهم انهم جابولى اخواتى دول .. شوية عيال مالهمش حل بصراحة ايمان وامل وأنا ( الساحرات الثلاثة) وجودنا مع بعض بيخلق فينا حالة جميلة اوى مالهاش وصف ويا حبذا بقى لو كانت الغزالة رايقة .. وقتها ما بنبطلش ضحك , شوية على ايامنا زمان واحنا صغيرين وكتير على حالنا واحوالنا دلوقتى .
احنا الثلاثة تركيبة غريبة , من الشكل للمضمون , بس الغريب ان لو اى حد شافنا مع بعض على طول يعرف اننا اخوات بالرغم من اختلاف شكلنا عن بعض .. يمكن روحنا متشابهة
بحبهم اوى العيال دول ربنا يخليهملى يارب ,, والحمد لله ولادنا كمان طالعين بيحبوا بعض خصوصا القريبين فالسن منهم .. محمود واسماء وايمان واميرة لما بشوفهم مع بعض بلاقينا فيهم .. عاشوا مع بعض سنين كتير وبتجمعهم ذكريات حلوة يمكن نور وندى وياسين ولاد امل ولادنا بيحسوا انهم اخواتهم الكبار لان فرق السن بينهم كبير و الملفت برضه انهم بيحبوهم .
الحمد لله من قبل ومن بعد .
النهاردة خرجت مع ايمان اختى ودخلت صيدلية فوقعت عنيا على سيكريه .. بيرفيوم من زماااااااان وللوهلة الاولى ما صدقتش انها لسة بتتصنع وسعدت سعادة عارمة لما شفتها وهوبا اشتريت منها اتنين واحدة ليا والتانية لايمان وفتحناها وشمناها واحنا مبتسمين ابتسامة عريضة
قد ايه حاجة صغيرة ممكن تخلى الواحد سعيد وترجعه لفترة قديمة يمكن نكون شايفنها دلوقتى من احلى فترات حياتنا على الرغم من امتعاضنا منها وقتها !
بحس مع اخواتى ان الدنيا حلوة وسهلة وما ببقاش شايلة هم لحاجة ولا خايفة من حاجة ,, يمكن لانى متأكدة انهم سند وحب وحماية حتى لو مفيش حاجة هيعملوها بس وجودهم مريح وربنا يديمه
احمد بقى ابننا احنا التلاتة حنين اوى وطيب فوق الوصف اطيبنا فعلا ...
ماما دايما تقول انه اطيبنا وأأدبنا واننا عصابة وروباطية
مش بقولكم الساحرات الثلاثة
امل انا كنت بطلق عليها كولومبو .. دماغ صاحية وصاحب امين جدا
ايمان بقى امى الصغيرة ودايما بتسايسنى وتدلعنى وتاخدنى على قد عقلى خصوصا لما اكون حاطة مكانه فردة جزمة وكتير بتقول ان مفاتيحى معاها وانا سايباها تقتنع بكده بس برضه اللى فدماغى بعمله هههههههههههه
وطبعا طبعا الست حسنة هانم امى بقى واللى مفيش كلام ممكن يوصفها ابدا
وايه كمان ايه كمان اصل انا ليا مزاج ارغى
ناهد : مرايتى و صاحبتى الانتيخ اللى تاريخى معاها , ماهو التاريخ مهم اوى , معاها بحس فعليا انى واقفة قدام المراية من غير تذويق ولا رتوش , حلو اوى ان فحياتنا نلاقى مراية نقية وامينة . مين تانى يا بت يا دودو
شاهى ونورا ودعاء البنات دول تركيبة غريبة جدا وسبحان الله على قد اختلافهم على قد توافقهم مع بعض بحب التعامل اوى مع شاهى وما اعتقدش انى اقدر ابعد عنها .. شخصية حلوة اوى من جوة تحسوها نضيفة وتتحس
نورا ممكن تكون محيرة للى بيتعامل معاها بالعقل انما اللى يحسها يلاقيها فريدة بجنانها وعقلها واقنعتها كتير ببقى عايزة اخبيها جوة حضنى واطبطب عليها
البت دعاء بحس فعليا انها بنتى و ببقى عايزة اطوق فيها الضرب خصوصا وهى بتقول عاااااادى على اى حاجة فيها مشكلة فى محاولة منها للغلوشة
وطبعا طبعا بناتى : ايمان واميرة حاجة مقرفة اوى وحلوة اوى مش عارفة انا ربيتهم ازاى وطلعوا كده ازاى وامى دايما تقولى ربنا اللى رباهم هههه مش عارفة هى كده بتذم فيا ولا ايه بالظبط بحبهم وبقرف منهم وبيوحشونى لما يخرجوا وبزهق منهم لما بيلزقولى كبروا بسرعة لدرجة انى ببصلهم ولوهلة بنسى انى انا اللى خلفتهم , العلاقة بينا بقت علاقة اخوات واصحاب ما بقيتش احس انى ام الا لما اقلب عليهم وحتى ده ما بقيتش اجيده لان وقتها البت ايمان بتضحكنى .
جريت السنين بكل ما فيها من حلو ومر وعدت حاجات كتير .. افراح واتراح ويمكن احلى حاجة حالة الرضا اللى البنى ادم بيحس بيها فى حياته على كل نعمة او نقمة ربنا ادهاله ,, صحيح كتير بنبقى تعبانين وبندور عالناقص وبنبص على نص الكوباية الفاضية بس من كرم ربنا علينا اننا فالوقت ده بنلاقى اللى زى ايمان وامل وحسنة وناهد وشاهى ونورا ودعاء وايمان واميرة واحمد
بنلاقى حد بيطبطب وحد بيضحك وحد بيسند وحد بيقولك انه موجود علشانك واكيد اكيد ربنا دايما موجود علشانا كلنا . ربنا يديم علينا الشعور بالرضا
ودمتم

مفيش فايدة

2011-04-13T15:14:00.003+02:00

نزلت ارمى كيس الزبالة فى الباسكت الموجود فالشارع لقيت واحد واقف يفتح فالاكياس ويبعتر الزبالة الموجودة فيها علشان ياخد علب الكانز الفاضية !! وقفت قلتله مش معقول يعنى الناس تنزل من بيتها وتحط الزبالة فالباسكت علشان الدنيا تبقى نضيفة وانت تبعزقها فعرض الشارع كده رد عليا بكل بساطة وواقعية : يعنى اموت مالجوع ؟ قلتله انا ما قلتش كده بس عالاقل لم الزبالة بعد ما تخلص اللى بتعمله قعد يبرطم شوية وردد نفس الكلام .. لقيت مفيش فايدة سيبته ومشيت ! الخروج مالبيت بقى ازمة .. الشارع مليان ميكروباصات وتكاتك وعربيات وزبالة وناس فعلا حاجة صعبة . امتحانات الميدتيرم هتتبتدى وربنا يوفق ايمان واللى زيها اميرة هيست من المذاكرة وابتدت القلق واللى فالواقع موجود على طول وربنا يكملها بالستر الحالة النفسية للجميع متردية من ظروف البلد واللى حاصل فيها من ناحية ومن الظروف الشخصية من ناحية تانية , يعنى ممكن اقول ان ماحدش حاسس بطعم لاى حاجة .. ايام بتعدى وتزق بعضها وتزق معاها سنين العمر . ودمتم

عايزة اقول تيييييييييييييت

2011-01-17T03:02:00.004+02:00

البوستات الاخيرة اللى كتبتها بت خيخة واى كلام حرقتلى دمى جدا وليا فيها رأى عايزة اقوله وأجرى على الله

عايزة اقول للراجل اللى يتجوز على مراته من واحدة مستريح لها ومعاها .. مهما يحصل ما تطلقهاش وتتحرق مراتك بجاز وسخ

لو انت كنت اتجوزت مراتك التانية دى بكاامل اقتناعك وارادتك وفعلا مستريح معاها ولا يهمك ولا تعمل حساب لاى حد

يابنى البنى ادم بيعيش مرة واحدة بس ومش الطبيعى انك تفضل تعبان او موجوع او حاسس انك مش عايش او انك مخنوق ومش عارف تتنفس بس علشان عيال انت مخلفهم !

ماهى العيال كده كده بتاعتك ومهما يحصل هيفضلوا شايلين اسمك . انا عايزة اقولك : استرجل لا مؤاخذة ومن غير ما تشرب بيريل

اثبت على مواقفك ودافع عن حقك وبلاش الخنوع والخضوع لرغبات الكونتيسة عزيزة مراتك جاتكم القرف .

بس خلاص

الى البت اللى مش خيخة ولا أى كلام

2011-01-15T00:27:00.003+02:00

كل سنة وانتى طيبة يا نوران وربنا يجعلها سنة صافية وحلوة وجميلة شبه المنظر ده

وان شاء الله تحققى كل اللى تتمنيه واللى فيه الخير ليكى

احبك يابت

عيدك سعيد وايامك سعيدة يارب

المدار المغلق

2011-01-11T23:33:00.001+02:00

مللتُ ضحكةَ الصباحِ
وارتعاشةَ المساءْ
جفّت بقلبيَ الغريبِ
نبعةُ الحروف والضياءْ
ماتت خطايَ
في رتابةِ السكونِ
والمقاطعِ المعاده
قاومتُ حزنيَ الغريبَ في
المساءِ
ما استطعتْ
واجهتُ خوفيَ القديمَ ذات ليلةٍ
فضعتْ
وأُغلقتْ معابرُ السعاده
بحثتُ عن مشاعرٍ جديدةٍ تهزُّني
عن عالمٍ يشدّني
فما وجدتْ
****
أوّاهُ نفقد اهتمامَنا
بالوقتِ والمكانْ
أوّاه حينما يضيع من زماننا
تعاقبُ الزمانْ
وتفقدُ الأشياءُ شكلَها
ولونَها
مع السأمْ
وينضبُ الحنانْ
أوّاه حين تصبح الوجوهُ
وجهاً واحداً بلا سماتْ
والحرفُ في الشفاهِ
يفقدُ الحياةَ لحظةَ الحياةْ
ويُولد الألمْ
لا شيءَ يستثير ضحكنا
لا دهشةٌ إلى الجديدِ
لحظةٌ تشدُّنا
لا حلمَ في عيوننا الجديبةِ الدموعِ
يمسحُ الأحزانَ

عزيزة كاتو

2011-01-11T06:01:00.001+02:00

يوميات امرأة

لماذا في مدينتنا ؟
نعيش الحب تهريباً وتزويراً ؟
ونسرق من شقوق الباب موعدنا
ونستعطي الرسائل
والمشاويرا
لماذا في مدينتنا ؟
يصيدون العواطف والعصافيرا
لماذا نحن قصديرا ؟
وما يبقى من الإنسان
حين يصير قصديرا ؟
لماذا نحن مزدوجون
إحساسا وتفكيرا ؟
لماذا نحن ارضيون ..
تحتيون .. نخشى الشمس والنورا ؟
لماذا أهل بلدتنا ؟
يمزقهم تناقضهم
ففي ساعات يقظتهم
يسبون الضفائر والتنانيرا
وحين الليل يطويهم
يضمون التصاويرا
أسائل نفسي دائماً
لماذا لا يكون الحب في الدنيا ؟
لكل الناس
كل الناس
مثل أشعة الفجر
لماذا لا يكون الحب مثل الخبز والخمر ؟
ومثل الماء في النهر
ومثل الغيم ، والأمطار ،
والأعشاب والزهر
أليس الحب للإنسان
عمراً داخل العمر ؟
لماذا لايكون الحب في بلدي ؟
طبيعياً
كلقيا الثغر بالثغر
ومنساباً
كما شعري على ظهري
لماذا لا يحب الناس في لين ويسر ؟
كما الأسماك في البحر
كما الأقمار في أفلاكها تجري
لماذا لا يكون الحب في بلدي
ضرورياً

نزار قبانى

2011-01-05T16:22:00.001+02:00

قمة الغباء ان الواحد يعتقد انه لا يمكن الاستغناء عنه !

احنا كبنى ادمين عندنا القدرة على الاستغناء عن اى شئ مهما كان ..

أسوأ حاجة ان البنى ادم يفضل باصص فى مرايته , مش شايف غير نفسه وبس !

و مش مهم بيوجع مين ولا بيضايق مين المهم بس نفسه وراحته . . والمصيبة انه دايما بيطلع الاعذار لنفسه واللى بيها بيكون المضحى الاكبر والشهيد .

اعتقد ان افضل عقاب للبنى ادم اللى كده هو التجاهل .. اعتباره مش موجود ولا كان .

دمتم

2010-12-31T06:59:00.002+02:00

كل سنة وانتم طيبين

ربنا يجعلها سنة سعيدة علي كل الناس

ويارب :

اشفى مرضانا وفرج كروبنا وحقق امالنا وارزقنا الرضا

ااااااااامين

2010-12-29T01:44:00.003+02:00

الشعور بالدفءالذى تولده لمسة يد -

نظرة العين التى تبث أروع القصائد -

الاحتواء النفسى والعطاء-

تلك المشاعر التى توارت فى زخم الحياة ,,

يا الله .. كم نفتقدها !

؟؟؟؟؟؟؟؟؟؟؟؟؟؟؟؟؟؟؟؟؟؟

2010-12-15T18:56:00.003+02:00

انا بحبك وعايز اعيش معاكى بس ظروفك لا تسمح لك بالاستقرار .. ولادك وتعلقهم بيكى ورفضهم لاى دخيل !
طب الحل ؟
نتجوز ونعيش حسب ظروفك .. نعيش المتاح , وانا هتجوز واحدة تانية تستقر معايا واعيش الحياة العادية اللى ممكن يعيشها اى حد !!
ازاى يعنى ؟
العقل بيقول كده !
احنا مش صغيرين وخسارة نضيع اللى بينا
طيب ايه رايك تفكك منى وتتجوز وتستقر وتعيش العادى اللى انت بتقول عليه ؟
لا مش هينفع لانى جربت كده قبل كده مرتين وما ارتحتش ولا نجحت . انا بحبك وما حبيتش حد بالطريقة دى وما اقدرش حتى اتخيل حياتى من غيرك !
انا ما عنديش اى استعداد اتوجع ولا اتجرح وما بحبش المشاكل وشايفة ان اللى باقى من العمر مش مستحمل ولا مستاهل ولا حتى شوية نكد .
بصى انا عارف انى ممكن اظلمك واجى عليكى واقصر معاكى بس انا فعليا ما ينفعش ابعد عنك .
فكرى بسرعة
خسارة الوقت اللى بيضيع مننا من غير ما نكون مع بعض !

ونقول بالعامية

2010-12-05T02:23:00.004+02:00

لانى ما بحبش اطول فالرغى والحكى اعتمادا على فهم المتلقى واللى بتخيله عارفنى فكتير كتير بتفهم غلط , هقول تانى الامنيات الممنوعة باللغة العامية وبالتفصيل على قد ما اقدر
بداية انا سميتها امنيات لانها فى اوقات كتيرة جدا بتكون امنيات وما بتحققش يعنى مثلا :
لما تكون ست متجوزة ومستقرة نوعا ما , بس بينها وبين نفسها بتتمنى ان جوزها ياخدها فحضنه ويطبطب عليها او يقولها كلمة حلوة من غير ما يكون بيرسم على لقاء حميمى .... تبقى دى حاجة مقررفة جدا
لما البنى ادم ست او راجل يبذل كل ما فى وسعه لاسعاد شريكه ويلاقى محاولاته بتتقابل بالبرود وعدم التقدير المعنوى حتى .... تبقى حاجة منيلة بنيلة سودة
لما البنى ادم راجل او ست يحس انه مقهور والعيال اللى مخلفهم هما سبب قهرته واستمراره او استمرارها فالجواز بس مع انه او انها ممكن يخلصوا نفسهم ويرتاحوا تبقى .... حاجة فى منتهى الغباوة !
لما الست ما تستمتعش فى العلاقة الحميمية مع جوزها وما تقولش لانه عيب وما يصحش والتربية والحياء ما بيقولوش كده وانه ممكن يشك فى اخلاقها وسلوكها قبل الجواز لو اتكلمت ............ تبقى حاجة مقرفة وظلم !
ولما الراجل يحاول يغير فى طريقة مراته فى العلاقة الحميمية وهى ما تتجاوبش وتقوله دا اللى موجود لو كان عاجبك ...... يبقى يع ويخرب بيت كده !
مش عيب اننا نحلى حياتنا بأى طريقة , حتى لو كانت الطريقة دى بعيدة عن التربية اللى اتربيناها والعادات اللى ورثناها واللى فعليا صدت ودابت طبعا طالما بعيدة كل البعد عن ما حرم الله
العيب اننا نقضى الوقت اللى ربنا محددهولنا فالدنيا تعبانين وبنعانى !
يعنى شوية بجاحة وشوية وقاحة مش هيخربوا الدنيا
دا بما ان الحياء مش دايما بيجيب نتيجة والصراحة الزايدة بيعتبرها الناس وقاحة .
ودمتم

امنيات ممنوعة

2010-12-02T18:04:00.003+02:00

ما يثير حنقى
بحثنا الدءوب عن حضن يحتوينا
عن كلمة اطراء , ربتة كتف او حتى ابتسامة عين
محاولاتنا المستميتة فى الارضاء
تنازلاتنا عن قوة
تمسكنا بالتقاليد البالية
تعلقنا كذبا برداء الحياء
اخفاء ما نحبه واظهار مالا نطيقه

انا خايفة

2010-11-23T12:40:00.002+02:00

لاإله إلا الله العظيم الحليم ، لاإله إلا الله رب العرش العظيم ، لاإله إلا الله رب السموات ورب العرش الكريم

ادعولى

اكسروا المراية

2010-11-22T16:56:00.002+02:00

الحب :

كتير بيخلينا نشوف كل حاجة بطريقة بعيدة عن الواقع ,

الوحش بيكون حلو فى نظرنا لمجرد اننا حبينه

القسوة والظلم بنطلع لهم مليون مبرر

ولما بنتوجع

بتبان كل حاجة على حقيقتها

الحب بيتوارى ومعاه كل الاقنعة بتقع وبنشوف من غير رتوش

الحقيقة اللى كان المحيطين بيشوفوها وبينبهونا وبيحذرونا منها واحنا كنا فى غفلة , سدين ودانا وقافلين عنينا وماشيين ورا مشاعرنا

مراية الحب عميا يا ريت نقدر نكسرها قبل ما يفوت الاوان

من حكايات مطلقة وام

2010-11-19T04:44:00.002+02:00

بنوتة جميلة وضحوكة الكل بيخطب ودها
المشاكل بين ابوها وامها تعبتها جدا , الخطاب بيجولها بالعبيط وفالنهاية اتجوزت
حسبتها بالعقل
اكبر منها فالسن بشويتين , يعنى هيدلعها ويهننها
بيشتغل فى وظيفة محترمة فى مكان محترم
بيصلى وعلاقته بربنا زى ما شافت كويسة
الفرق اللى بينهم اجتماعيا واضح لكل ذى عين يبقى اكيد هيتعامل معاها برقى
اللى اكتشفته بعد الجواز انه لابس وش وانه انسان لا يعاشر
بيظهر غير ما يبطن
جلنف بكل ما تحمله الكلمة من معنى
خلفت منه , ماهى الخلفة مش بالمزاج يعنى
طب مش مستريحة هى
تتطلق ؟
وقفت قدامها مليون لا
ما عندناش طلاق فالعيلة
انتى خلفتى يبقى لازم تستحملى
والكلام اياه المتوارث اللى لا بيودى ولا بيجيب
استحملت
والعيل جاب التانى وهى مستحملة
بس السنين تقيلة وما بتعديش
بقت تدعى ربنا انه يخلصها منه حتى لو بالموت
جت لها فرصة الخلاص وخلصت
وفجأة لقت ولادها معاها
ومسئولية وتربية ومصاريف ومدارس
وهى اللى كانت محبوسة فقمقم وما تعرفش حتى تشترى الخضار !
اتعلمت تعمل كل حاجة ونجحت
قعدت مع نفسها وافتكرت مشاعرها ايام مشاكل امها وابوها
وقد ايه كانت تعبانة
وقررت انها ما تخليش ولادها يعيشوا نفس التعب
قربت من طليقها وبقت تتكلم معاه وتشركه فكل حاجة تخص ولادها
وكأنه عايش معاهم بالظبط
ربنا كرمها فعيالها وطلعوا زى الفل من غير عقد
بس بين وقت والتانى بتقعد تستعجب من قدرتها على التعامل من شخص كرهته فى يوم من الايام لدرجة تمنى الموت على النظرة فوشه او سماع صوته !
لقت انها كبرت ونضجت وفهمت وانها كمان كانت صح وما ندمتش ابدا على الخلاص منه
ولقت انه كمان اتغير للاحسن شويتين بس برضه لسة جلنف ولا يعاشر

من حكايات زوجة ثانية

2010-11-18T03:21:00.007+02:00

لما قبلت انها تكون الزوجة التانية ليه فالسر قبلت بس لانها حست انه من حقه انه يحافظ على بيته اللى فيه عياله وحقه انه يكمل نواقصه يعنى يحب ويتحب ويسد الخروم اللى موجودة فحياته !

كانت بتسعى جاهدة انها تسعده وتحافظ على بيته واستقراره , يعنى تجيب له البريفيوم اللى بيستعمله علشان ريحته ما تبقاش متغيرة , تدور يمكن تكون شعرة منها لزقت على هدومه , ما تطلبش منه لقاء ولا تتصل بيه ولما كان يشتاق لصوتها ,, يتصل بيها من تحت البطانية وتفضل هى تتكلم وهو يادوب يدوس عالزراير قال يعنى بيرد عليها !

لما كان يكلمها عالنت من بيته كان بيقول لمراته انه بيكلم دكتور فيل وتقوم هى تغير الاى دى لدكتور فيل وكمان تحط له صورة علشان مراته ما تحسش بحاجة !

كانت بتفكر له طول الوقت

فى مشاكله مع مراته وفمصلحة ولاده

وكانت بتحاول ترضيه بكل الطرق

وبالفعل ابتدت دنيته تتظبط ووقتها

حس انه كداب كبير ومش قادر يستمر فالكدب على مراته ولا على اللى حواليه وقالها انه تعبان ومش قادر يستمر وعايز ينفصل

حايلت شوية وبعدت شوية وزعلت شوية وبعدين عملتله اللى كان عايزه وراحت قابلته عند المأذون واتطلقوا

حبته هى ؟

اه يمكن لانها طلعت معاه مخزون عواطف شايلاها من سنين

ومع ذلك وجعها وداس عليها ونسى كل اللى عملته معاه وعلشانه !

دلوقتى اكتشفت انه يستحق بس

حياته اللى عايشها

اليك !

2010-11-12T04:37:00.005+02:00

اكتشفت بعد ذلك, أنه لم يكن بإمكانها أن تغير شيئا. فتلك الكلمات ما كانت لغته فحسب. بل كانت أيضا فلسفته في الحياة, حيث تحدث الأشياء بتسلسل قدريّ ثابت, كما في دورة الكائنات, وحيث نذهب "طوعاً" إلى قدرنا, لنكرر "حتماً" بذلك المقدار الهائل من الغباء أو من التذكي, ما كان لا بدّ "قطعاً" أن يحدث. لأنه "دوماً" ومنذ الأزل قد حدث, معتقدين "طبعاً" أنّنا نحن الذين نصنع أقدارنا!
كيف لنا أن نعرف, وسط تلك الثنائيات المضادّة في الحياة, التي تتجاذبنا بين الولادة والموت.. والفرح والحزن.. والانتصارات والهزائم.. والآمال والخيبات.. والحب والكراهية.. والوفاء والخيانات.. أننا لا نختار شيئا مما يصيبنا.
وأنّا في مدّنا وجزرنا, وطلوعنا وخسوفنا, محكومون بتسلسل دوريّ للقدر. تفصلنا عن دوراته وتقلّباته الكبرى, مسافة شعره.
كيف لنا أن ننجو من سطوة ذلك القانون الكونيّ المعقّد الذي تحكم تقلباته الكبيرة, تفاصيل جدّ صغيرة, تعادل أصغر ما في اللغة من كلمات, كتلك الكلمات الصغرى التي يتغير بها مجرى حياة!
يوم سمعت منه هذا الكلام, لم تحاول أن تتعّمق في فهمه. فقد كان ذلك في زمن جميل اسمه "بدءًا".
ولذا كم كان يلزمها من الوقت لتدرك أنهما أكملا دورة الحب, وأنه بسبب أمر صغير لم تدركه بعد, قد دخلا الفصل الأخير من قصة, وصلت "قطعاً" إلى نهايتها!
عندما ينطفئ العشق, نفقد دائمًا شيئاَ منّا. ونرفض أن يكون هذا قد حصل. ولذا فإنّ القطيعة في العشق فنّ, من الواضح أنّه كان يتعمّد تجنّب الاستعانة به, لتخفيف ألم الفقدان.

أنزعج من هذا المنطق العجيب للأقدار, الذي يجعل دائماً في كل علاقة, بين رجل وامرأة, طرفاً لا يستحق الآخر. وربما

هي تعرف أن الحب لا يتقن التفكير. والأخطر أنه لا يملك ذاكرة.
إنه لا يستفيد من حماقاته السابقة, ولا من تلك الخيبات الصغيرة التي صنعت يوما جرحه الكبير

كم هي رهيبة الأسئلة البديهية في بساطتها, تلك التي نجيب عنها دون تفكير كل يوم, غرباء لا يعنيهم أمرنا في النهاية, ولا يعنينا أن يصدقوا جوابا لا يقل نفاقا عن سؤالهم.
ولكن مع آخرين, كم يلزمنا من الذكاء, لنخفي باللغة جرحنا؟
بعض الأسئلة استدراج لشماتة, وعلامة الاستفهام فيها, ضحكة إعجاز, حتّى عندما تأتي في صوت دافئ كان يوما صوت من أحببنا.
"كيف أنتِ؟"
صيغة كاذبة لسؤال آخر. وعلينا في هذه الحالات, أن لا نخطئ في إعرابها.
فالمبتدأ هنا, ليس الذي نتوقعه. إنه ضمير مستتر للتحدي, تقديره "كيف أنت من دوني أنا؟"
أما الخبر.. فكل مذاهب الحب تتفق عليه.

ربما ظن أن على الرجل إذا أراد الاحتفاظ بامرأة, أن يوهمها أنّه في أية لحظة يمكنه أن يتخلى عنها.
أما هي, فكانت دائما تعتقد أن على المرأة أن تكون قادرة على التخلي عن أي شيء لتحتفظ بالرجل الذي تحبه.
وهكذا تخلت ذات يوم عن كل شيء وجاءته.
فلم تجده.

كم يلزمها من الأكاذيب, كي تواصل الحياة وكأنه لم يأت! كم يلزمها من الصدق, كي تقنعه أنها انتظرته حقّا

الذاكرة أحسن خادم للعقل، والنسيان احسن خادم للقلب

أينتهي الحب عندما نبدأ بالضحك من الأشياء التي بكينا بسببها يوماً؟

من كلمات احلام مستغانمى

2010-10-26T00:54:00.004+02:00

I THINK SOME SCARS ARE MEAN TO STAY .

2010-10-19T23:46:00.002+02:00

النهاردة كان يوم جميل بكل المقاييس بجد انا سعيدة جدا واتبسطت اوى خالص جامد

2010-10-17T21:11:00.003+02:00

أن تجد نصفك الاخر , تتنفسه وتتنفس من خلاله

أن تكون لحظاتكما معا هى عمرا بمجمله

ياله من احساس !

فيه ناس ما ينفعش تتنسى

أبجنى تجدنى

2010-10-05T03:18:00.002+02:00

هو حال البلد الوسخ ده مش ناوى يتغير !

لما بهيم صاحب ارض جنبى يشتغل فالبنا من نص الليل ولغاية دلوقتى وبالبلدوزر ,, يعنى ولا فيه نوم ولا مدارس ولا جامعة والمفروض كمان اللى بيشتغل ما يروحش الشغل .
ولما اتصل بشرطة النجدة وما يتأخروش على غير العادة ويمشوا ويرجع الحفر تانى وكأنك يا تيتى لا روحتى ولا جيتى ما تفهموش بقى اخدوا فلوس ولا عملوا ايه ؟
اتصل بالنجدة تانى يرد عليا السيد المحترم يقول لى ابعتلك العربية تانى بس تنزلى بقى وتيجوا كلكم عالقسم ياخى تييييييييييييييييييت
انزل الفجر علشان اعمل محضر لان البلد دى بلد وسخة وماشية بالرشوة واللى مش عاجبه يخبط دماغ اللى جابوه فالحيطة
ملعون ابو الحكومة عالرشاوى عالمحسوبيات عالتربية والتعليم على المجلس القومى للنسوان وتييت
الله يرحمك يا ابويا كنت بتقول : خرابة وليها علم

2010-07-12T02:31:00.001+03:00

أحسنت ظنك بالأيام إذ حسنتْ

ولم تخف سوء ما يأتي به القدرُ

وسالمتك الليالي فاغتررت بهـا

وعند صفو الليالي يحدث الكدرُ

الامام الشافعى

الحمد لله

2010-06-12T23:32:00.000+03:00

العمر بيجرى

لما بقعد معايا بلاقينى عديت بمصايب ومشاكل ما تتعددش وكنت وقتها شيفاها تهد جبل !

واهى خلصت وكل حاجة بتخلص وما بيبقاش بعدها الا شوية وجع
ومع الوقت اللى بيعدى بسرعة ومعاه العمر بيجرى

كله بيتنسى

الحمد لله

ان شاء بكرة هيبقى عمرى اربعين بالتمام والكمال
وكشف حسابى فيه التالى :

جوازة من 21 سنة نجحت بكل المقاييس برغم انتهائها , لان نتاجها ايمان واميرة
كملت تعليمى وبقيت مترجمة على الرغم انى ما بشتغلش ولا ناوية !

ما وجعتش حد ولا أذيت حد

علاقتى بربنا بقت اقوى , واتم الله فضله عليا بعمرتين ,, عقبال الحج بقى بعد خمس سنين لما اوصل للسن القانوني

عقلى اصبح اكثر نضجا ولكنى ما زلت عصبية وصريحة مع الاسف !

بفت نظرتى للناس اكثر واقعية الحمد لله اخيرا وما بحاولش اكبر دايرة معارفى واكتفيت بذلك القدر من الاوجاع

عملت مدونتى من ३ سنين ومنها اتعرفت على ناس محترمة وحلوة من جوة اوى وفيها فضيت اللى ينفع افضيه واللى ما ينفعش ربنا شاله

النتيجة انى راضية الحمد لله

مع انى كتير ببص لنص الكباية الفاضى وابقى تعبانة وزعلانة ,, بس بلاقى اللى يطبطب عليا و يفكرنى بالنص المليان

واللى فالوااقع كباية مليانة وفضل وكررم من المولى لا يكفيه الحمد والشكر ابد الدهر

الحمد لله ملء السماوات والارض وما بينهما

يبقى اقول

كل سنة وانا راضية بما قسمه الله لى

كل سنة وانا حمداه , شكراه على افضاله ونعمائه وجبره لى
ادعولى بدوام الرضا

يارب

2010-06-12T03:34:00.001+03:00

بداية امتحانات اميرة

دعواتكم

? ؟ ؟ ؟

2010-06-11T02:05:00.003+03:00

يا ترى هييجى اليوم اللى هقول :

صالحت بيك ايامى ,, سامحت بيك الزمن

نسيتنى بيك الامى ,, ونسيت معاك الشجن

تساؤلات

2010-05-24T23:41:00.002+03:00

ليه اللى تملكه اليد تزهده النفس ؟

ليه ما بنحسش بقيمة الحاجة الا لما تضيع مننا ؟

غريبة طباع البنى ادمين !

نفسى

2010-05-18T00:10:00.000+03:00

افضى دماغى

ابطل تفكير

وافوض امرى الى الله

2010-05-07T22:03:00.002+03:00

حيرانة انا بين قلبى وقلبى

اااه يانى

2010-04-28T04:28:00.000+02:00

اتغيرت نظرتى للناس صحيح ,, ما بقيتش شايفاهم كويسين الى ان يثبت العكس .. بس برضه مش شايفاهم وحشين الى ان يثبت العكس !
انا بس ما بقيتش استغرب او اتخض او حتى احزن زى ما كنت لما ما بلاقيتش المتوقع .. العادى والطبيعى .
يعنى بقيت فاهمة ومقتنعة ان اللى كنت بعمله وطريقة تفكيرى هى الغباء بعينه ... انى انتظر من اللى قدامى انه يبقى زييى .. يتعامل معايا بنفس الطريقة اللى بتعامل بيها !
كلنا مختلفين عن بعض فى كل حاجة حتى ولو كنا متفقين فى الاساس ॥( الصح والغلط والعيب والحلال والحرام) واللى بتنتاوله بطريقة مختلفة .. كل واحد فينا بيفلسفه وبيستطعمه ويحسه ويتعامل بيه بطريقة غير التانى ।
الاخوات اللى اتربوا فى نفس البيئة وشاتلهم نفس البطن مختلفين عن بعض ,, يبقى ليه انا استنى ولا اطلب من ايا كان انه يبقى زى ما انا حابة ؟
ريحتنى الحكاية دى بس كمان تعبتنى !
بقول لنفسى ده وضع طبيعى صحيح بس ماهو كان الاكثر طبيعية والاصح ان الناس تتعامل بوضوح ونقاء وصفاء وكأنهم بيعاملو نفسهم .. مش الصح اننا نعامل الناس كما نحب ان يعاملونا ؟
وارجع اقول : ماهو مش كل الناس بتكون امينة مع نفسها ومش كل الناس بتحاسب نفسها وفيه كتير اوى عايشين كده ومقضينها .
فعلا لله فى خلقه شئون

من الحياة

2010-04-09T03:33:00.003+02:00

البنى ادمين الصح المفروض انهم يحبوا بعض ويحبوا لغيرهم اللى يحبوه لنفسهم ,, ما يبقوش منفسنين بس تعالوا كده نستعرض بعض الحالات المرضية وخصوصا خصوصا بين الازواج
احنا اتفقنا قبل كده ,, او يعنى انا كنت قلت قبل كده ان بطريقة ما كلنا مرضى نفسيين واللى مش هيفهم يعنى ايه بقى يبقى يرجع للبوستات القديمة
احيانا لما الراجل يحس ان مراته متفوقة عليه بصورة ما , اجتماعيا , ثقافيا او حتى دينيا بيحس بالغيرة والنقص وما بيكونش قدامه حل غير انه يسعى جاهدا لتحطيمها معنويا !
ما انكرش ان كتير من الرجالة بينجحوا فى ده خصوصا لو كانت الست هشة اصلا أو لا تتمتع بالثقة فالنفس واللى لو اتوجدوا بياخد الراجل اكبر بمبة فى حياته وهى ان الست بترتقى اكثر كل ما يحاول يدوس عليها , والمصيبة الاكبر بقى ان بيقع من نظرها لما بتفهم !

لما الراجل يعمل فيها قديس ومضحى ومتحمل فوق طاقته بس علشان خاطر العشرة والعيال وان مراته جانية عليه وهو مستسلم ومحروم
بحس ان الموازين اتقلبت ,, طب ما تبعبع لمراتك احسن واشتكيلها منها لو انت كنت امين وصادق وبلاها الاسطوانات !

لما الراجل يعمل فيها سبع اوى ويتجوز على مراته من غير علمها وشوية يتقلب قطة بقدرة قادر !

لما يشتكى من تخن مراته او اهمالها للبيت او لنفسها وينسى يبص فالمراية ولا يشوف كرشه الممدود لمترين قدامه او حتى يشم ريحة عرقه وهو راجع مالشغل !

لما ما تعجبهوش نتايج ولاده فالمدرسة ويرجع ده لاهمال امهم ,, طب جربت مرة تقعد تذاكر لهم يا عبقرى ؟

ليه كتير من الرجالة بيبقوا مهندمين فالشغل وبيتمتعوا بشخصية ومظهر مختلف تماما فالبيت وما حدش يقول لى الكلام المعتاد انه لازم يكون على راحته فبيته انما التعامل مع الناس لازم يكون بطريقة مختلفة ,, تكونش اللى فالبيت دى من بنى ادم يعنى ولا ايه ؟ دا حتى اللى يحتاجة البيت يحرم عالجيران !

ليه كتير من الرجالة رافعين شعارات وبيستخدموا الفاظ ضخمة تدل على المثالية والثقافة اللامتناهية وبيستعملوا الدين لمصلحتهم وهما لا بينفذو ولا بيتعاملوا بأى حاجة من دول اصلا ؟

كانوا زمان بيقولوا ان الراجل طالما مش سكرى (بضم السين) ولا بتاع نسوان (قال يعنى هه ) ولا بيلعب قمار ولا بخيل يبقى مش من حق الست انها تشتكى منه ,, ولا زى ما قالوا ان الراجل ما يعيبوش الا جيبه !!
انا ارفض واشجب واعترض اشد الاعتراض , القصة مش بخل ولا خمرة ولا نسوان ولا قمار لان الطبيعى ان البلاوى دى ما تكونش متواجدة !
والراجل يعيبه حاجات كتير
ما يعيبوش ابدا انه يكون خالى الجيوب
يعيبه ان يكون خالى الانسانية ,, خالى المشاعر جاحد
يعيبه انه يكون انانى ومتكبر متغطرس
يعيبه انه يكون راجل بالاسم وبس
الرجولة انك تحمى وتتحمل وتحتوى
الرجولة انك تكون امين وصادق وواضح
الرجولة انك تعتذر لما تغلط ,, مش تتجنى وتظلم

ما حدش ييجى يقول لى انتى متحاملة عالرجالة ولا انتى انضميتى لكلنا ليلى
اللى انا قلته ده بيحصل وبيحصل كمان الاكثر منه فبيوت كتير ,, يعنى مش جايباه من عند ابويا ولو عايزين قصص حقيقة بالتفصيل قولوا وانا ابتدى
ياللا بقى فوتكم بالعافيه

2010-04-01T17:04:00.003+02:00

اقتنعت دوما ان فاقد الشىء هو اكثر عطاء له
والحصاد مطابقا للمنح

امنح حبا احصده

فاذا بالعادة ( افة كل شىء) تضرب بقناعتى عرض الحائط !

يا طيب

2010-04-01T03:11:00.004+02:00

كفاية تكون انسان
فى زمان فيه طيبة القلب بتتعيب !

الحمد لله رب العالمين

2010-03-30T18:30:00.004+02:00

كل سنة وكل الامهات بخير

2010-03-21T17:17:00.002+02:00

الى جميع الامهات حتى ...
ام المصريين
وام الخلول
وام المعارك
وام اربعة واربعين
وام صابرة بتاعة الطعمية
وام الدنيا
وامهات الكتب والدواجن
وام العروسة
وماما نونة
وام ركب حلوة
وام على بالقشطة او بدون
انا مش عايزة ازعل أى ام النهاردة
كل سنة وانتن طيبات ,,, ولا عزاء للابهات

2010-03-12T21:16:00.002+02:00

المفروض عليا انى افهم واقدر ظروف اللى حواليا ,, وابقى دايما موجودة وقت ما يحتاجونى ,, وانا اتحرق بجاز وسخ
طظ ومش مهم !
اكتشفت انى مالياش اصحاب !!
الغلط منى اكيد ,, مقتنعة ان الدنيا اخد وعطا صحيح بس انا ما اتعودتش اخد
عودت اللى حواليا انهم ياخدوا وده بقى حقهم وبرضه اتحرق انا بجاز وسخ .

2010-03-07T03:18:00.000+02:00

نتقدم فالعمر وتنفطر قلوبنا
كلنا نمضى فى رحلة الحياة ,, كعابرى سبيل !

اووووووف

2010-03-04T02:44:00.002+02:00

مضغوطة جدا لدرجة انى حاسة انى هنفجر
محتاجة استخبى فأى مكان ما حدش يعرفه ,, عايزة اقعد لوحدى فعلا
ز هقااااااااااااااااااااانة لابعد مدى ومش عايزة اعمل حاجة ولا نفسى فحاجة
مش قادرة اتحمل اكتر من كده !
مش مبسوطة بقت حاجة قليلة
انا طهقانة , قرفانة , مش طايقة العيشة , عايزة اقول مليون ... للدنيا باللى فيها

2010-02-26T01:19:00.005+02:00

مر بى كعابر سبيل ولا تقتلع اسوارى
فأنا يا حبيب سواى
اعرف جيدا ,
أن بوسع رجلا مثلك
أن يخلفنى
مشتتة وممزقة
كحفنة من الغيوم الشفافة ,
على صفحة سماء صيف أزرق
سأكرهك قريبا ,
لانك رجل يمكن أن احبه حقا !!

غادة السمان

سلامو عليكو

2010-02-15T03:14:00.002+02:00

كان لازم اسافر الاسبوع الاول من اجازة نص السنة لان الاسبوع التانى كله دروس للانسة اميرة ॥ وقد كان وسافرنا الغردقة بالرغم من الحالة الصحية للانسة ايمان وطبعا طبعا كالعادة او كعادة الحظ معايا الجو كان صقيع مع ان الغردقة مشتى يعنى !

عدى يوم والتانى والتالت وهوبا جالى الخبر , جدى توفاه الله وطبيعى رجعت فنفس اليوم وحالة امى لا يرثى لها ,, ربنا يصبرها

استأنفنا الدروس وامى قاعدة معايا وايمان بتتحسن ببطء الحمد لله ।

عندى حالة بلاهة متمكنة منى بشدة وانا عاملة نفسى مش واخدة بالى خااااااااااالص !

كل سنة وانتو طيبين ,, عيد الحب بقى والذى منه ويارب الناس كلها تحب بعض لان اكيد وقتها الدنيا هتتغير بس انتوا قولوا يارب

سلامو عليكو

استر يارب

2010-02-02T22:09:00.003+02:00

ونقول سلامو عليكو
يعنى اصلا اساسا انا قرفانة كده ومش طيقانى وعايزة اقول اوف بقى
قوم ايه :
الانسة ايمان يجيلها برد غريب جدا وتزداد حالتها سوءا بالرغم من انى بديلها دوا واذ فجأة افتكر ان فيه وباء منتشر اسمه انفلونزا الخنازير واقوم واخداها عالمستشفى وطبعا طبعا مفيش لا مسحة ولا دياولو والحكاية متوقفة على الوقت مضاد حيوى ودوا كحة وقياس درجة الحرارة كل شوية واذا لم يحدث تحسن نرجع عالمستشفى وتاخد دوا الفيرس !
و الانسة عندها امتحان بكرة ان شاء الله والانسة اميرة ابتدت العطس هى كمان .
من الاخر كده يعنى الجو العام مفتكس اخر حاجة
ولله الحمد من قبل ومن بعد ।
دعواتكم بقى وربنا يستر

احساسى

2010-01-27T01:08:00.004+02:00

مبقيتش فهمانى

هالوون عليكم

2009-12-26T18:19:00.002+02:00

نقول فالسريع برضه موجزالانباء ههه
جدى أبو أمى متوعك وطبعا طبعا أمى اعانها الله هى اللى تعبانة بيه ومعاه وقضيت عيد زى الفل طبعا بسبب الحكاية دى ربنا يرحمنا جميعا وما يطولش علينا ولا يخلينا نحتاج لحد ... قولوا امين
البنات الحمد لله تمام والدراسة هلكاهم ومدرسةالانسة اميرة اتقفلت بسبب أنفلونزا الخنازير بس هى كده كده ما بتروحش وربنا يسترعلى ولادنا ويحفظهم وفالنهاية برضه العلم لا يكيل بالبيتينجان ههه
الايام ماشية علىوتيرة واحدة وما بيتغيرش فيها الا نوع الشكوى من المحيطين بيا بسالحمد لله مفيش مشاكل ولا حاجة فوق العادة ومش عارفة بقى دى وجهة نظرى انا بس ولا انا بقيت حلوفة ؟
اخر حاجة بقى حصلت امبارح ,, رن التليفون ولقيت الشاب اللى بيدرس لايمان التأمين بيكلمنى ويقولى انه معجب بيها جدا وعايز ييجى يتقدم وقعد يقولى فيها شعر هههههه وانا بصراحة انشكحت جدا وكل ما انده عليها اقولها يا عروسة وهى تتغاظ وطبعا طبعا الموضوع ده مرفوض مؤقتا لغاية ما تخلص الجامعة السنة الجاية ان شاء الله وبناءا على كلام ابوها
الكلمتين اللى جايين دول لواحدة انا بحبها اوى وبحسها قريبة منى وكتيربكون عايزة اضربها علشان تفوق ودايما بحس انى عايزة اخدها فحضنى واطبطب عليها ,, ست جميلة قمة الضعف والقوة مع بعض بس اه لو تصحى وتفكها من المثالية اللى هى معتنقاها !
فاتيما هانم ام يوسف
شغلانى كتير وبقعد افكر فيكى كتير وليكى اكتر بس ما بعرفش اقول
انتى حلوة من جوة مع انك خربانة وتعبانة ودى حاجة مش سهلة بالمرة
ياريت تخلى بالك من نفسك وياريت تحبيها اكتر من كده لو سمحتى
احيانا بنحتاج قليلا من الانانية
لكى من قلبى كل الحب والتقدير مصحوبين بالكثير من الدعوات
وسلامو عليكو

وحشتونى

2009-12-26T01:05:00.000+02:00

ازيكم عاملين ايه ان شاء الله تكونوا كلكم بخير يارب

عدنا بعودة النت وسأوافيكم بالاخبار بعد الفاصل

2009-11-25T12:31:00.002+02:00

كل سنة وانتم طيبين
ويارب ايامكم كلها عيد

المختصر

2009-11-24T23:41:00.001+02:00

2009-11-24T03:11:00.002+02:00

I'm lonely, it makes me sad but i've to stop waiting

2009-11-19T16:06:00.004+02:00

I've been angry for very long time .
I'm exhausting .

2009-11-18T13:29:00.001+02:00

عايزة اتدفس جوة حضن

احبك مشمش

2009-11-16T13:07:00.006+02:00

النهاردة عيد ميلاد مشمش .. أمل اختى ,,ام قلب ابيض ..
. أحلى اخت وأأمن صديقة فى الدنيا
بدعيلها وادعولها معايا ربنا يجعل ايامها وسنينها سعادة ويبارك لها فى ولادها وجوزها ويخليها لينا كوووووووووولنا وانا اولهم .
أمل عقلى لما بتوه بتبقى زى الشمعة اللى بنولعها لما النور يقطع .
كل سنة وانتى دايما طيبة وحنينة وعاقلة وبخير

بعتلك شوية تورتات .. أولهم تورتاية لنور وندى وياسو

حلاوتك يابلدى

2009-11-14T22:06:00.003+02:00

يا جمال المصريين لما يحبوا يعملو حاجة ,, مفيش حاجة تقدر تمنعهم ... يفرحوا القلب ويسعدوا ما شاء الله عليهم .
اه لو بس يلاقوا شغل ويرتاحوا فحياتهم كانوا بقوا حاجة تانية
وياسلام لو نتجمع زى ما اتجمعنا كلنا كلنا و نحاول ننضف بلدنا وشوارعنا وبيوتنا واشغالنا اكيد اكيد هننجح
وهنفرح .
كنت بتكلم مع البنات فى الحكاية دى وبقولهم لو احنا اللى فالبيوت وال100000 اللى فى الاستاد واللى عالقهاوى اتلمينا علشان ننضف الشوارع تفتكروا هناخد قد ايه من وقت ؟
ردت ايمان وقالتلى 5 دقايق

حلوة يا بلدى بشبابك ورجالك وبناتك وستاتك .. حلوة بلمتنا وتشجيعنا لبعضينا وهتبقى احلى لو نضيفتى على ادينا

2009-11-10T17:11:00.002+02:00

don't be sorry for somehing that wasn't yours from the beginning

ازاى

2009-11-03T13:08:00.002+02:00

ازاى تخيلت اننا قريبين ؟
ما كنتش شايفة ,, ولا كنت خايفة أشوف

اعمل ايه ؟

2009-10-31T20:18:00.002+02:00

من عشرين سنة لما جيت انا وابويا نتفرج على شقة الزوجية .. واللى هتبقى بتاعتى فيما بعد لقيتها عبارة عن اوضة جوة اوضة جوة اوضة ,, حاجة عاملة كده زى بيت جحا لدرجة انى لما روحت بيتنا ما عرفتش اوصفه لامى واخواتى .
بس هحاول اوصفهولكم لانى عيشت فيه كتير بقى : باب الشقة لما يتفتح كان فيه صاله صغيرة وفنصها ارش يدخلنا على اوضة فيها بلكونة وعلى شمال الاوضة الاقى ارش تانى يدخلنى على اوضة ههههههههه
ولما نخرج تانى على الصالة الصغيرة دى الاقى على شمالها المطبخ وجنب المطبخ اوضه وعلى شمال الاوضة صالة صغيرة تانية وعلى يمين الاوضة الحمام وجنب الحمام اوضة كبييييرة اللى هى اوضتى .
طبعا ما حدش فهم حاجة هههههه
ما علينا
وبما انى مهبوشة وغاوية تغيير فجه فأنفوخى من كام سنة انى اغير نظام الدنيا قوم ايييييييييه
شيلت الحيطة بتاعة الصالة الصغيرة اللى قدام باب الشقة وفتحتها على الاوضة اللى فيها البلكونة وبقى عندى ريسبشن لا بأس به وعملت باب حلو لطيف كده للاوضة اللى على شمال الاوضة اللى فيها بلكونة وخليتها اوضة البنات والاوضة اللى جنب المطبخ عملتها ليفنج لطيف ظريف مريح .. وأوضتى هى هى ما غيرتهاش !
طب انا بقول كده ليه بقى ؟
اصلى زهقت مالنظام كده وعايزة اجيب اوضة البنات مكان الليفنج واخلى الليفنج مكان اوضة البنات ,, أو افتح باب الشقة التانى اللى عند الحمام واللى جنب اوضتى وانقل الريسبشن فلاوضة دى واخرج اوضتى مكان الريسبشن ,, او اسيب الشقة دى واعزل لحسن زهقت بقى هههههههههه
ايه رأيكم

اااااااااااه يا ايدى

2009-10-29T03:40:00.003+02:00

اليوم ابتدا حلو الحمد لله ,, رحنا المدرسة انا وايمان واميرة وامى ربنا يخليهالنا يارب وحضرنا الطابور وتلاه التكريم والحمد لله ملء السماوات وارض وما بينهما .
رجعنا وفطرنا ودخلنا نمنا واميرة فالمدرسة وماشى اليوم عادى خالص ..
صحينا وابتديت اعمل الغدا والذى منه وقلت بالمرة اغير نظام الليفنج لحسن دا بقاله اسبوع وانا مهبوشة وبزهق ,, وقد كان .
دخلت اخدت حمام وقاعدة مستكنيصة بتفرج عالتى فى وكله فالتماموز .. جالى مزاج اشرب نسكافيه ,, قلت قومى يا بت دلعى نفسك واشربى بمزاج وانت بتتصفحى النت ودخلت المطبخ وشغلت البويلر ومسكت الماج بايدى الشمال والبويلر فى ايدى اليمن وبصب المية وهوبا اتقلبت المية كلها على ايدى واتحرقت !!
اااااااااااااه يا ايدى ربنا ما يوريكم وربنا يجيرنا من النار ومن عذاب النار .

فوتكم بعافية

ما شاء الله لا قوة الا بالله

2009-10-27T16:45:00.003+02:00

بكرة الاربعاء الساعة 7 ونص صباحاهنروح مدرسة اميرة علشان عاملين لها حفلة تكريم لتفوقها العلمى .
والحمد لله على نعمائه وعظيم كرمه
دعواتكم

STOP

2009-10-23T04:36:00.003+02:00

BROKEN HEARTS TAKE SOME TIME TO RECOVER .

قيل عنى

2009-10-22T14:39:00.006+02:00

كالبئر بلا غطاء .. صافي الماء

مشمش

2009-10-19T18:11:00.004+02:00

امل
بنى ادم جميل .. واضحة وصريحة وامينة وحافظة للاسرار ,, علاقتها بربنا اساس لتعاملها بالبنى ادمين .
كانت مستفزة .. خصوصا لما يكون اللى بيكلمها محتاج حد يطبطب عليه ومش محتاج لوم بس الحمد لله غيرت العيب ده ولو انه مش عيب ( احقاقا للحق بعنى ) .
شايلة هم كل اللى حواليها والكل صعبان عليها وعايزة تعمل اى حاجة علشان تريح كل الناس .
ست نضيفة لاقصى درجة مسمينها مدام نظيفة
حنينة ودموعها قريبة
دمااااااااااغ .. لما اكون مزنوقة فى اى حاجة بتلاقيلى الحل فى ثوانى ومسمينها كولومبو هههه
لما بتحتد بتبقى صعبة جدا ودايما تقول : لحظة واحدة انا عايزة اقولك على حاجة وبحس انها شوية شوية هتمدنى على رجلى ومسمياها أبلة الناظرة .
بحبها وبقصر معاها كتير لانها ساكنة بعيد عنى
بيتوجع قلبى عليها لما بتزعل او بيكون عندها مشكلة وببقى عايزة اطير اخدها فحضنى واطبطب عليها .
أم حنينة وزوجة جميلة وست خجولة ونضيفة وشاطرة ومحترمة ومتدينة وطيبة .... دى أمل اختى واللى بنقولهامشمش و كولومبو ومدام نظيفة وابلة الناظرة
احبك يا مشمش

غلبنى الشوق

2009-10-07T02:48:00.001+02:00

احيانا نفتقد أنفسنا !

strange !

2009-10-01T02:40:00.004+02:00

sometimes , the more things change .. the more they still the same !!

لست أدرى !

2009-09-28T19:42:00.004+02:00

تغيرت كثيرا انا عبر السنين ..
تخليت متعمدة عن ضعفى ودموعى وطيبة قلبى التى طالما سببت لى الكثير من الشقاء !
تنازلت بارادتى عن خفة ظلى واحللت مكانها .. الجدية ,, العقلانية
واريت مشاعرى والتى كنت اجعلها دوما فى الصدارة
أراضية انا عما أصبحت عليه ؟؟
لست أدرى !

حقى ولا مش حقى ؟

2009-09-22T03:08:00.005+02:00

كلمة كتبتهالى قوس قزح بتهريج فى تعليقها :
صورة الموجة تحفة
اوعى بس تقلبى علينا زيها !
خلتنى افكر و...
لقيتنى بقلب وبالفعل قلبت على ناس كتييييييييييرة جدا وقلبتهم من حياتى تماما بس مش لاسباب عبيطة وتافهة ,, والغريب ان السنين بتمر وبيرجعوا يخبطوا على بابى !!
يمكن انا دلوقتى ما بقيتش احوش ولا اشيل وبقيت اتحلى بالجرأة الكافيه وبقول اللى انا عايزاه اول بأول ,, ويمكن كمان بقيت مقتنعة ان كلنا فينا عيوب ومش بالضرورة نبقى شبه بعض من جوة واكبر دليل على كده انى انا واخواتى مش متشابهين على الرغم من ان اساسنا واحد !
اه فيه شوية حاجات ما بحبهاش فى التعامل مع البنى ادمين زى الكدب والكدب والكدب وحطو تحتيه اللف والدوران والخيانة ماهم دول داخلين فالكدب بصورة ما ,, وما احبش الغيرة بالمرة ,, الغيرة منى لانى ما بغيرش من حد الا فيما يختص بالدين !
ما بحبش التباهى والفشخرة لانى بتحسسنى بنقص اللى بيعملوا كده وبقرف بصراحة .
ما بحبش الصوت العالى والطريقة الحادة فى الكلام لانها بتخرجنى عن شعورى وببقى زبالة اخر حاجة , ما احبش الاكل بصوت ولا صوت طرقعة اللبانة وصوت قزقزة اللب .. ممكن يجيلى انهيار عصبى بجد بجد !!
واكيد كل الحاجات اللى ما بحبهاش دى ما بتخلينيش اقلب على حد وده بكل امانة
مالاخر يعنى :
انا بقلب لما باخد على قفايا من حد انا اديتله وردة زرعتها ورعيتها ورويتها بمشاعر دافية من غير ما انتظر مقابل الا سعادى البنى ادم ده .
حقى ولا مش حقى ؟
ولا اقولكم زى الاعلان : حقها ولا مش حقها هههههههه

كل سنة وانتم طيبين

2009-09-19T18:32:00.002+02:00

كل سنة وانت جميعا طيبين وبخير وربنا يجعل ايامكم كلها سعيدة وان شاء الله يارب يكون ربنا تقبل مننا صالح الاعمال وتجاوز عن سيئاتنا وعيد سعيد

2009-09-19T06:22:00.004+02:00

ما اغرب تأثرنا بالظروف ,, والتى تشكلنا كقطع الصلصال ..كل على قدر تحمله

2009-09-14T15:48:00.000+02:00

ايمو

2009-09-01T19:22:00.003+02:00

.. النهاردة عيد ميلاد امى الصغيرة
اختى الكبيرة وتوأم روحى كل سنة وهى طيبة ودايما معانا ومحوطانا بحبها واهتمامها
كل سنة وانتى طيبة يا ايمو وربنا يخليكى لينا والتورت دى ليكى

2009-08-30T14:13:00.005+02:00

ابويا وحشنى
طبطبته عليا
نظرة عنيه الطيبة
كلامنا مع بعض
واحشنى يا ابويا
اه لو تيجى تاخدنى فحضنك !!
يارب ارحم موتانا

كل سنة وانتم طيبين

2009-08-14T20:54:00.002+03:00

رمل فى الكلى .. ارتفاع رهيب فالدهون الثلاثية والكوليستيرول مصحوب بورم فالجثة
هو ده حالى الفترة اللى فاتت ولله الحمد من قبل ومن بعد
عدا ذلك فكله فالتمام
ايمان الحمد لله نجحت وخلصت كورس كمبيوتر وكورس انجليزى وبتروح الجيم
وهنبتدى دروس الثانوية الغارقةللانسة ميرا وربنا يعديها على خير يارب واخرج منها بدون علة .
كل سنة وانتم جميعا طيبين وربنا يعيد عليكم وعلى المؤمنين والمسلمين جميعا بالخير وربنا يبلغنا رمضان ويتقبل منا جميعا صالح الاعمال ويتجاوز عن سيئاتنا اللهم امين
دعواتكم

جواز البنات

2009-07-24T00:06:00.004+03:00

اول امبارح ايمو بنتى كانت فى فرح صاحبتها
والنهاردة فى خطوبة صاحبتها التانية
ربنا يسعدهم يارب

طبعا طبعا واكيد الام بتفرح لما بنتها تكبر وتتجوز بس يا ترى صح انها تجوزها بدرى كده ؟
دول فال19 بس
يعنى مفيش نضوج نفسى ولا عاطفى يبقى ازاى نجوز اطفال ونخليهم يشيلوا مسئولية راجل وبيت وبعد شوية مسئولية اطفال ؟

لما رجعت من الفرح قعدت تاكل ودانى بالتفاصيل
ولما امى قالتلها عقبالك قالتلها:
لا لسة بدرى .. قدامى سنتين اتخرج وبعدين اشتغل واعتمد على نفسى وبعدين افكر فالجواز !!
أن أن أن أن
باين البت بنتى معقدة يا رجالة
الا ما بتفكر فى حد ولا بتحب حد لا هى ولا اختها
ولما مرة اتكلمنا مع بعضياتنا فى هذوكا الموضوع الشائك وهرجت معاهم وقلتلهم الا مافى واحدة فيكم جت قالتلى انا بحب فلان ولا فلان بيحاول يكلمنى ,, ردت الانسة ايمو و قالتلى انها مش هتحب الا اللى هتتجوزه
وقالت : اصل ايه لازمة انى اعرف حد ويتسلى بيا واصيع معاه ؟
وبعدين حرام .

وطلعت انا ام منحرفة وبناتى مؤدبين ههههههههه
فوتكم بعافية

طير انت

2009-07-18T02:55:00.002+03:00

رحت النهاردة فيلم طير انت مع البنات
حلو الفيلم ولو انه مأخوذ عن فيلم اجنبى .. بس احمد مكى او اسرة الفيلم كانوا امناء كفاية انهم يكتبوا ده .
ودينا بقت شبه امها جدا جدا واجادت التمثيل بصورة جامده
الفيلم عايز يقول ما تغيروش نفسكم لاى سبب وده طبعا للناس المظبوطة واللى اساسها سليم .
اه صحيح الفيلم تخرج منه مش فاكر حاجة فيه بس كان لطيف وقتيا واهو تغيير
اللى يمكن لفت نظرى فى الفيلم اغنية عن البلد والحاكم كنت هعيط منها وحسيت انها بتوصفنا احنا .. المصريين
فوتكم بعافية

الحرية والوحدة

2009-07-16T18:05:00.004+03:00

الحرية وعلى الرغم من اختلاف مفهومها بين الناس الا انها عزيزة .. وعزيزة هنا يعنى نادرة
اللى انا شخصيا اختبرته ,, ان دايما الممنوع مرغوب وبمجرد ما الممنوع ده يبقى متاح بيفقد اهميته .
فى الغالب احنا كبنى ادميين بنكره القيود المفروضة علينا سواء ان كانت من الاهل او الزوج او حتى العادات والتقاليد ..
ويمكن ده ناتج عندنا احنا -نون النسوة تحديدا- لاحساسنا بالدونية .. نتيجة للتربية !
حتى فى المشاعر ..
المشاعر المفروضة كتير بتكون قيد بيخنق وبالتالى ما بيكونش ليها طعم
يمكن موضوع خيخة هو اللى خلانى اكتب كده
عايزة اقول : ان الحرية الاختيارية بتكون ممتعة ولكنها مؤلمة جدا لما بتكون اجبارية
وده عن تجربة .
ونمسكها مالاول واحكيلكم عنى
لما كنت متجوزة ما كنتش بخرج خالص الا مع جوزى .. ما عنديش اصحاب وما بخرجش الا فى الاماكن اللى هو يحددها زى النادى او عند اهلى او اهله .. حتى السوق كان ميزة لا اتمتع بها يعنى كنت زى الست امينة كده
ما اعرفش اى حاجة فى اى حتة ولا حتى بعرف اشترى خضار زى بقية الستات
وطبعا طبعا كنت مخنوقة وحاسة انى كلب مربوط فى ايد صاحبه
لما انفصلت بقيت اخرج كل يوم وبقى عندى اصحاب كتير وحسيت وقتها انى بعوضنى عن سنين الربطة والخانقة !
واتطلقت واستقريت فالبيت مع البنات وخلاص خلاص بقت حريتى فى ايدى اعمل كل اللى انا عايزاه وما حدش هيحاكمنى
بس اللى حصل انى بقيت حاسة بقيد اكبر
وما بقيتش احب اخرج من البيت اساسا وكتير بقعد بالاسابيع فى البيت مش عايزة اخرج وطلبات البيت بجيبها بالتليفون !
ولما بقيت اقعد معايا لقيت ان القيد هو اللى كان مخلينى ادور عالحرية.. وما الحرية الا احساس بالمسئولية .
وتعالو اقولكم كمان على الوحدة وما تحمله من احساس بالحرية بطريقة ما ..
البنات وسن المراهقة والدروس والمذاكرة وتغير المزاج والخناق والبوز وكل ما يتعلق بتربية العيال كتير كان بيخنقنى وخصوصا انى راجل وست وساعات كنت بقول انا بس عايزة اجازة اقعد لوحدى .. اتنفس
حاسة انى شايلة حمل تقيل على راسى تاعبنى ومحتاجة بس انزله شوية اخد نفسى وارجع اشيله تانى واكمل المشوار ..
بس اللى كان بيحصل لما البنات يسافروا مع ابوهم مثلا او حتى يخرجوا يقضوا اليوم برة انى بحس بالوحشة .. بالملل .. بحس انى روحى مش موجودة
وبشوف الدنيا فاضية والفضا خانقنى وما ببقاش عايزة اعمل حاجة .. على الرغم من انى حرة وينفع اشغل القناة اللى انا عايزاها وما حدش هيقولى انه عايز اللاب توب
!!! بس مش عايزة
الوحدة الاختيارية ممتعة .. لما نحتاجها
ناخد نفسنا وننزل حملنا نرتاح علشان نعرف ندى
اما الوحدة الاجبارية فقاتلة .. ربنا ما يوعد حد بيها
اتمنالكم جميعا التمتع بحريتكم

كلمات

2009-07-15T03:31:00.001+03:00

عندما ينطفئ العشق نفقد دائما شيئا منا ونرفض أن يكون هذا قد

حصل

من الأسهل علينا تقبل موت من نحب على تقبل فكرة فقدانه واكتشاف أن بإمكانه مواصلة الحياة بكل تفاصيلها دوننا

أنزعج من هذا المنطق العجيب للأقدار الذي يجعل دائما في كل علاقة بين رجل وامرأة طرفا لا يستحق الآخر

يحدث للحياة أن تهدي إليك الشيء الذي تحبه الأكثر في المكان الذي تكرهه فطالما أذهلتني الحياة بمنطقها غير المتوقع

الحرية هي أن لا تنتظر شيئا

الحقيقة تعبر عن نفسها بشكل بشع والحب يبدو دائما أجمل مما هو

حين نكون تعساء ندرك تعاستنا ولكن عندما نكون سعداء لا نعي ذلك إلا في ما بعد 00إن السعادة اكتشاف متأخر

إن وقوعنا في الحب لا علاقة له بمن نحب وإنما لتصادف مروره في حياتنا بفترة نكون فيها دون مناعة عاطفيه لأننا خارجون توا من وعكة عشقية00فلنلتقط حبا كما نلتقط رشحا بين فصلين00

ثمة أناس لهم تلك القدرة الخرافية على المشي فوق قلوب الآخرين دون شعور بالذنب

الأجدر أن يعرف الإنسان بما فقد وليس بما يملك فنحن دائما نتيجة ما فقدناه

إن كل إنسان عفيف يحمل داخله قدرا كافيا من القذارة قد تطفو يوما فتغرق حسناته تماما كما أن في أعماق كل إنسان سيء شعلة صغيرة للخير ستضيء داخله يوما

إنني في حاجة إلى أن أموت أحيانا لأعي بعد ذلك أنني مازلت على قيد الحياة

من قرائتى لاحلام مستغانمى و... فوضى الحواس

سقوط الاقنعة

2009-07-09T03:00:00.003+03:00

ماالقناع الذى يرتيده اغلبنا الا زيف ... سيسقط عاجلا او اجلا

تشبيه بليغ

2009-07-08T18:44:00.004+03:00

النهاردة حد .. معرفة قديمة كان بيتكلم او بيتناقش معايا فى مسألة جوازى ,, جدواها
اتجوز ولا لا وايه اللى هيتغير ؟
لقيتنى بقول :
لو اعتبرت ان حياتى عبارة عن تورتاية من غير تذويق .. والتزويق - الكريز مثلا - هو الجواز
اتوجد او ما اتوجدش التورتاية هى هى وطعمها مش هيتغير !
بل ممكن التزويق يكون بايظ ويخربها يبقى ايه الفايدة ؟؟
الغريب اننا كبنى ادمين دايما دايما بندور عاللى ناقصنا مع ان الموجودات اللى ربنا من بيها علينا كتير جدا , واللى لو اخدنا بالنا منها هنرتاح ومش هندور عالنواقص واللى ممكن تكون القشة اللى قصمت ظهر البعير
ولا اييه ؟

رؤية الالم

2009-07-05T00:15:00.005+03:00

لما قالى : afew good men ان الالم بيتحس ما بيتشافش لقيتنى بهز راسى زى العبيطة وبرد عليه واقوله ان الالم بيتشاف بعقلنا ..
الالم الجسدى بيكون ليه سبب ,,
اللى عنده صداع على سبيل المثال بيكون سببه من الاسنان , النظر , الامساك او حتى صداع نفسى .. وقيسوا ده على كافة الامراض العضوية
تعالوا بقى على الالم النفسى اللى سببه جرح المشاعر , علاقة حب فشلت , صداقة باظت , جوازة اتفشكلت أو ما شابه ذلك
هقول ان الالم النفسى كمان بيتشاف بالعقل وده لما نقعد نحلل ونفكر علشان نوصل لسببه ,, سبب الفشل أوالوجع أو الجرح !
يعنى القصة كلها فى تشغيل العقل وفصله عن المشاعر ساعتها هنشوف ألمنا والغريب اننا ساعتها -. وقت ما نشوف المنا - مش هنتألم
بعقلنا عرفنا ربنا
وَيَتَفَكَّرُونَ فِي خَلْقِ السَّمَاوَاتِ وَالْأَرْضِ رَبَّنَا مَا خَلَقْتَ هَذَا بَاطِلاً سُبْحَانَكَ فَقِنَا عَذَابَ النَّارِ .

صدق الله العظيم

2009-07-03T23:48:00.001+03:00

SHOW ME YOUR PAIN AND I WILL SHOW YOU MINE !

حوار

2009-06-08T16:26:00.003+03:00

لست رخيصة, ولست شرقية تتاجر بمظهر شرقيتها .. انى امنح حينما اكون صادقة مع نفسى وأنا أمنح ...
قال : ما الذى يضمن لى اخلاصك
أجبت : احترامى لذاتى. أنا معك دونما ضمانات غير كيانى الذاتى وصدقى .. ان سواك من الرجال غير موجودين فى عالمى كذكور كى أشتهيهم ما دمت -ذكرى- لا أستطيع ان أخونك فالجنس لدى .. امتدادللحب .. أسلوب اخر للحوار .. لا أعرف الجنس المعزول . ولا استطيع استيعابه
واذا اشتهيت سواك فهذا يعنى أننا انتهينا منذ زمن طويل وانك لم تعد فى عالمى , ولم أعد مسئولة امامك .. وفى هذه الحالة أخبرك بذلك سلفا ...
ومن يضمن لى ذلك ؟
صدقى .. الشرقية المزيفة تضمن لك حفظ المظاهر ولكنها لا تضمن لك الصدق..
ومن يضمن صدقك ؟
فى العلاقات الانسانية ليست هنالك ضمانات من طرف واحد .. هنالك علاقة حية ديناميكية متنامية شرطها الاساسى صدقك انت أيضا .. صدقك الحقيقى , لا المظهر الاجتماعى السليم لسلوك قد يخفى لحظات من الزيف ..
ولكننى رجل , وأنت انثى ..
ولماذا يكون الزيف حقا يطالب به الرجل الشرقى ؟ .. وميزة يجب أن يمارسها . أنت الشرقى وأنا مجرد انسانة صادقة .
وأحسست فى تلك اللحظة أن الحوار بيننا مات . ان الكلمات فى عالمى تعنى شيئا اخر يختلف عما تعنيه نفسها فى عالمه !!

بعضا من كلمات غادة السمان و ... زمن الحب الاخر

2009-05-24T07:08:00.004+03:00

لما بشوف ولاد اختى دلوقتى وبشوف المعاناة اللى هى فيها من تربيتهم وخصوصا انهم لسة صغيرين بقول ياخبر ..
هو انا زمااااااااااان عيالى كانوا كده ؟؟ ياااااااه دا انا باينى تعبت قوى على ما كبروا ههههههه
واقول الحمد لله ان المرحلة دى خلصت - الطفولة يعنى - .
الغريب انى ما بقاش عندى خلق ولا طولة بال للتعامل مع الاطفال ,, ممكن بس اكون بتمنى يكون عندى بيبى !! مش عارفة ليه بس اهو ده احساسى وخلاص !
وارجع اقول لنفسى هااااانت .. بكرة البنات يتجوزو ويجيبولى صبيان وبنات
تربية العيال صعبة اوى ..ان كانوا اطفال بتكون مرهقة جسديا ولما بيكبروا بتبقى مرهقة ذهنيا وطبعا طبعا الارهاق الجسدى بيكون مستمر وبيتضاف عليه التقدم فالعمر يعنى حاجة كده مالهاش حل

عجبا

2009-05-20T17:27:00.002+03:00

هاهو فى العقد الخامس من عمره .. مستمتعا أيما استمتاع بحياته . ناسيا او متناسيا ما وهبه الله من هبات كثيرة .. متمثل أهمها فى اولاده !
لم يهده عقله لاستثمار بعضا من وقته معهم ,, لم يحاول ادخار بعض الذكريات التى تجمعهم سويا .
غبى أم واقعى ؟
كنت اظن انه من البديهى ان نفضل بعضنا -أولادنا - على انفسنا .. ولكننى وجدت ان لكل منا حساباته الخاصة .
تائهة انا .. متحيرة .

الباقى قليل

2009-05-20T16:25:00.003+03:00

. هنأته بذكرى ميلاده الذى يقترب وسألته ضاحكة : كم اصبح عمرك ؟ فأجابنى لا اعلم ولا أحسب الباقى قليل ..وددت لو قلت له

ما قل ودل

2009-05-17T22:38:00.004+03:00

اسوأ حاجة اننا نحكم عالبنى ادميين بالمظاهر .. مش دايما الاناء ينضح بما فيه

وياللا علشان ما تزعلوش

2009-05-12T01:28:00.003+03:00

حسيت انكم عايزين شوية تفاصيل فقلت والله مااانا مزعلاكم ونبتدى :
كان المفروض اسافر يوم السبت 25 -4 واذ فجأة جالنا تليفون ان السفر بقى بقدرة قادر يوم الجمعة والكلام ده اتعرف بعد الصلاة مباشرة والحمد لله رحنت عالمطار وطبعا البنات جالهم اكتئاب لانى هبعد عنهم وانا ضغطى بقى عالى وواصل للسما .. لنفس السبب ما علينا
ركبنا الطيارة ونزلنا مطار جدة واترمينا فالمطار 4 ساعات علشان ياخدوا بصمة العين والايدين ,,, حظووووووووووووظ ومش هقولكم عن المعاملة الزبالة اللى بيعملوها للمصريين !
وخلصت الا 4 ساعات وخرجنا مالمطار عالعربيات علشان نطلع مكة والحمد لله
و الفندق 5 نجوم وتمام التمام اه صحيح بعيد عن الحرم بس فيه باصات تابعة ليه بتودينا لغاية هناك والحمد لله
رحنا نعمل العمرة بقى ومش هقولكم عالزحام ,, ربنا يزيد يارب
بس اللى ما عجبنيش بصراحة واستغربتله التزاحم والزق وخصوصا عند الحجر الاسعد يااااااااااالله
شوية شوية الناس هتضرب بعض !!
ولله فى خلقه شئون وسبحان مين خلانى امسك اعصابى
وعملنا العمرة الحمد لله وربنا يتقبل وبقينا متفرغين للصلاة وقراءة القران .. فضلا من الله
واكرمنى ربنا وعملت عمرة تانية لجدتى رحمة الله عليها وعلى سائر امواتنا
وفعلا فعلا دعيتلكم كلكم .. وعلى الله الاجابة انه سميع الدعاء
وخلص الاسبوع بسرعة فى مكة ومش عايزة ازم فى اهلها بس فعلا اهلها كشرين وصعب جداالتعامل معاهم,,, و رحنا على المدينة واللى بكون سعيدة جدا جدا فيها وبحس انى رايحة بيت ابويا
صلى الله على محمد وعلى اله وسلم
متعة
متعة وراحة وصفاء وناس بشوشة

الخلاصة يعنى يا جماعة

الحمد لله ملء السماوات والارض وما بينهما
راجعة متفائلة وهادية وراضيةوحاسة بصفاء وشوق للعودة وربنا يكتبهالى كل سنة بس هبقى اخد
,, معايا بعضى .. البنات يعنى
اللى جم اخدونى مالمطار وجايبين لى بوكيه ورد وخاتم هدية والبت ايمو عاملة الغدا .
ربنا يبارك فعيالنا
وكفاية كده بقى انا قلتلكم كل الاخبار اهه
تصبحوا على خير

انا جييييييييت

2009-05-11T19:16:00.002+03:00

دعيت لكم كلكم .. ربنا يتقبل